लखनऊ- तरुणीचे लैंगिक शोषण केल्याप्रकरणी भाजप नेते आणि माजी केंद्रीय मंत्री स्वामी चिन्मयानंद यांना अटक करण्यात आली आहे. विशेष तपास पथकाने (एसआयटी) उत्तरप्रदेशातील शहाजहापूर येथून चिन्मयानंद यांना अटक केली आहे. जिल्हा रुग्णालयात त्यांना वैदकीय तपासणीसाठी नेण्यात येणार आहे. त्यामुळे रुग्णालयाबाहेर तगडा बंदोबस्त ठेवण्यात आला आहे. स्वामी चिन्मयानंद यांना १४ दिवसांची न्यायालयीन कोठडी देण्यात आली आहे.
स्वामी चिन्मयानंद यांना अटक केल्याची माहिती त्यांचे वकिल पूजा सिंह यांनी दिली. शहाजहापूर येथील कायद्याचे शिक्षण घेणाऱ्या एका तरुणीने स्वामी चिन्मयानंद यांच्यावर बलात्काराचा आरोप केला होता. यासंबधीचा एक व्हिडिओही समाज माध्यमांवर व्हायरल झाला होता. या प्रकरणी एसआयटीने मागील शुक्रवारी चिन्मयानंद यांची ७ तास चौकशी केली होती.