नागरिकत्व दुरुस्ती विधेयक : गुवाहटीत संचारबंदी शिथील, इंटरनेट सेवा बंदच

आसामधील गुवाहटी येथे आज सकाळी 9 ते सायंकाळी 4 या वेळेत संचारबंदी शिथील करण्यात आली आहे. इंटरनेट आणि संदेश सेवा अद्याप बंद आहे.

गुवाहटी -ईशान्य भारतामध्ये नागरिकत्व विधेयकाविरोधात विविध निदर्शने सुरू आहे. आसाम, त्रिपुरामध्ये सैन्य तैनात करण्यात आले आहेत. आज सकाळी 9 ते सायंकाळी 4 या वेळेत संचारबंदी शिथील करण्यात आली आहे. तर मोबाइल, इंटरनेट आणि संदेश सेवा अद्याप बंदच आहेत.

नागरिकत्व दुरुस्ती विधेयक लोकसभेत आणि राज्यसभेत पास झाले आहे. मात्र, या विधेयकाच्या विरोधात संपूर्ण ईशान्य भारत रस्त्यावर उतरला आहे. आंदोलनामुळे ईशान्येकडील राज्यांमधील जनजीवन ठप्प झाले आहे. मोठ्या संख्येने पोलीस बंदोबस्त तैनात करण्यात आला आहे. ईशान्य भारतात सुरू असलेल्या आंदोलनांच्या पार्श्वभूमीवर, केंद्रीय गृहमंत्री अमित शाह यांचा शिलाँग दौरा रद्द करण्यात आला आहे. तर दुसरीकडे, जपानचे पंतप्रधान शिंजो अ‌ॅबे यांचा पूर्वनियोजित भारत दौराही पुढे ढकलल्याची माहिती आहे. पश्चिम बंगाल राज्यामध्ये ममता बॅनर्जी यांनी रॅली आयोजित केली आहे. दिल्लीमध्येही विधेयकाविरोधात आंदोलन सुरू आहे. या सर्व घडामोडींच्या पार्श्वभूमीवर येत्या काळात होणाऱ्या राजकीय घडामोडी पाहणे औत्सुक्याचे ठरेल.