'जर भाजपने मुख्यमंत्री पदाचा उमेदवार जाहीर केला नाही, तर लोकांची मते खड्ड्यात'

मुख्यमंत्री पदाच्या उमेदवारासोबत आम्ही वादविवाद करण्यास तयार आहोत. जर भाजपने मुख्यमंत्री पदाचा उमेदवार जाहीर केला नाही, तर लोकांची मते खड्ड्यात जाणार, असे केजरीवाल म्हणाले

नवी दिल्ली - विधानसभा निवडणुकीच्या पार्श्वभूमीवर भाजप आणि आम आदमी पक्षामध्ये चांगलीच जुंपलेली पाहायला मिळत आहे. मुख्यमंत्री पदाचा उमेदवार जाहीर करावा, असे आव्हान दिल्लीचे मुख्यमंत्री अरविंद केजरीवाल यांनी भाजपला केले आहे, यावर केंद्रिय गृहमंत्री अमित शाह यांनी उत्तर दिले आहे.

भाजपने मुख्यमंत्री पदाचा उमेदवार जाहीर करावा, अशा मागणी दिल्लीकर करत आहेत. नागरिक कोणाला मतदान करणार आहेत, हे दिल्लीकरांना जाणून घ्यायचे आहे. मुख्यमंत्री पदाच्या उमेदवारासोबत आम्ही वादविवाद करण्यास तयार आहोत. जर भाजपने मुख्यमंत्री पदाचा उमेदवार जाहीर केला नाही, तर लोकांची मते खड्ड्यात जाणार, असे केजरीवाल म्हणाले होते.

अरविंद केजरीवाल यांच्या या आव्हानावर केंद्रिय गृहमंत्री अमित शाह यांनी उत्तर दिले आहे. आप बरोबर वादविवाद करण्यास मुख्यमंत्री पदाचा उमेदवार जाहीर करण्याची गरज नाही, आम्हाला वेळ आणि ठिकाण सांगा भाजपमधील कोणीही तुमच्याशी वादविवाद करण्यात तयार आहे. भाजपचा मुख्यमंत्री म्हणजे दिल्लीची जनता असे, अमित शाह म्हणाले.दिल्ली विधानसभा निवडणुकीचा प्रचार शेवटच्या टप्प्यात आली आहे. राहुल गांधी, अरविंद केजरीवाल, पंतप्रधान मोदी, अमित शाह यांच्या आज सभा झाल्या.