धक्कादायक : मूत्र प्यायला नकार दिल्याने उत्तर प्रदेशात 'प्रभावशाली' व्यक्तींकडून वृद्धाला चोप

उत्तर प्रदेशातील ललितपूर परिसरात एका 65 वर्षांच्या वृद्धाला मारहाण झाल्याचा प्रकार समोर आला आहे. मारहाण करणाऱ्यांनी पीडित वृद्धाला मानवी मूत्र प्यायला लावले. या प्रकाराला विरोध केल्यानंतर संबंधित व्यक्तीला काठ्यांनी मारहाण करण्यात आली आहे.

ललितपूर (उ.प्रदेश) - हाथरसच्या घटनेनंतर उत्तर प्रदेशात राजकीय आणि सामाजिक वातावरण ढवळून निघणारी आणखी एक घटना समोर आली आहे. एका 65 वर्षांच्या दलित वृद्धाला अमानुष मारहाण झाल्याचे एका आठवड्यानंतर उघडकीस आले. त्यावेळी पीडित वृद्धाच्या मुलाने पोलीस ठाण्यात तक्रार दिली होती. मात्र आरोपींकडून तक्रार मागे घेण्यासाठी दबाव आणण्यात येत होता.

रोडा गावात राहणाऱ्या पीडित वृद्धाने याबाबत खुसाला केला आहे. सोनू यादव नावाच्या एका व्यक्तीने त्यांना मूत्राने भरलेला कप दिला. ते पिण्यास नकार दिल्याने त्यांना काठीने मारहाण करण्यात आली. काही दिवसांपूर्वी त्यांच्या मुलावर कुऱ्हाडीने वार करण्यात आल्याचे वृद्धाने सांगितले. याविरोधात पोलीस ठाण्यात तक्रार दिली. मात्र, आरोपीने त्यांना तक्रार मागे घेण्यासाठी दबाव आणला, असे ते म्हणाले.

यावर पोलीस अधीक्षक मिर्जा मंजर यांनी अधिक माहिती दिली. रोडा गावातील काही प्रभावशाली लोकांनी काही जणांना मारहाण केल्याचे त्यांनी सांगितले. याची माहिती मिळताच पोलिसांनी एफआयआर दाखल केला. तसेच मुख्य आरोपीला ताब्यात घेण्यात आले असून अन्य काही जणांचा शोध सुरू आहे, असे ते म्हणाले.

उत्तर प्रदेशात अनुसुचित जाती-जमातीतील नागरिकांवर होणाऱ्या हल्ल्यांचे प्रमाण दिवसेंदिवस वाढत आहे. एका अहवालानुसार 2019मध्ये 11 हजार 829 केसेस एससी-एसटी कायद्यान्वये दाखल करण्यात आल्या आहेत. यानंतर राजस्थानचा क्रमांक लागतो. राजस्थानमध्ये 6 हजार 794 आणि बिहारमध्ये 6 हजार 544 खटले दाखल करण्यात आले आहेत.