नवी दिल्ली- जम्मू काश्मिरमधील पुलवामा येथे गुरुवारी केंद्रीय राखीव पोलीस दलाच्या (सीआरपीएफ) ताफ्यावर दहशतवादी हल्ला झाला. यात ४५ जवानांना हौतात्म्य आले. या हल्ल्याचा निषेध आंतरराष्ट्रीय स्तरावर केला जात आहे. जगातील ४८ देशांनी या हल्ल्याचा निषेध करून भारताला समर्थन दर्शवले आहे.
संयुक्त राष्ट्रसंघाने पुलवामा हल्ल्याचा तीव्र शब्दात निषेध केला आहे. यासंबंधी त्यांनी एक निवेदन जारी केले. यात ते म्हणाले, की आम्ही पुलवामा येथे झालेल्या हल्ल्याचा निषेध करतो. यात ज्या जवानांनी प्राणार्पण केले त्यांचे कुटुंबीय आणि भारतीयांप्रती आम्ही सहानुभूती व्यक्त करतो. यात जखमी झालेल्यांच्या परिस्थितीत लवकर सुधारणा व्हावी. तसेच, यातील पीडितांना न्याय मिळावा, अशी आम्ही अपेक्षा करतो, असे संयुक्त राष्ट्रसंघाने म्हटले आहे.