വയനാട് മെഡിക്കൽ കോളജ് നിർമാണം ഉടന്‍ ആരംഭിക്കുമെന്ന് ആരോഗ്യമന്ത്രി

ജില്ലയിലെ മെഡിക്കൽ കോളജ് നിർമാണം ഡിസംബറിൽ തുടങ്ങുമെന്നും രണ്ടു വർഷത്തിനുള്ളിൽ മെഡിക്കൽ കോളജിൽ അഡ്‌മിഷന്‍ തുടങ്ങാനാണ് സർക്കാർ ലക്ഷ്യമിടുന്നതെന്നും ചേലോട് എസ്റ്റേറ്റിൽ ഭൂമി സന്ദർശിക്കാനെത്തിയ മന്ത്രി കെ.കെ. ശൈലജ പറഞ്ഞു.

വയനാട്: ജില്ലയിലെ മെഡിക്കൽ കോളജ് നിർമാണം ഡിസംബറിൽ തുടങ്ങുമെന്ന് ആരോഗ്യമന്ത്രി കെ.കെ. ശൈലജ. മെഡിക്കൽ കോളജ് നിർമാണത്തിനായി വൈത്തിരി പഞ്ചായത്തിലെ ചേലോട് എസ്റ്റേറ്റിൽ കണ്ടെത്തിയ ഭൂമി സന്ദർശിക്കാനെത്തിയതായിരുന്നു മന്ത്രി. 50 ഏക്കർ ഭൂമിയാണ് മെഡിക്കൽ കോളജ് നിർമ്മാണത്തിന് ചേലോട് എസ്റ്റേറ്റിൽ കണ്ടെത്തിയിട്ടുള്ളതെന്നും അടുത്തമാസം പകുതിയോടെ ഭൂമി കൈമാറി കിട്ടുമെന്നും മന്ത്രി പറഞ്ഞു.

രണ്ടു വർഷത്തിനുള്ളിൽ മെഡിക്കൽ കോളജിൽ അഡ്‌മിഷന്‍ തുടങ്ങാനാണ് സർക്കാർ ലക്ഷ്യമിടുന്നത്. മെഡിക്കൽ കോളജിന് വേണ്ടി മടക്കിമലയിൽ കഴിഞ്ഞ സർക്കാർ കണ്ടെത്തിയ ഭൂമി ഉപേക്ഷിക്കില്ലെന്നും മെഡിക്കൽ കോളജിന്‍റെ അനുബന്ധ ആവശ്യങ്ങൾക്ക് ഈ ഭൂമി ഉപയോഗിക്കാനാണ് തീരുമാനമെന്നും മന്ത്രി കൂട്ടിച്ചേർത്തു.