വയനാട്ടില്‍ 28 ലക്ഷത്തിന്‍റെ കുഴല്‍പ്പണം പിടികൂടി

പച്ചക്കറി വാഹനത്തിന്‍റെ കാബിനിൽ സൂക്ഷിച്ച പണം മുത്തങ്ങ തകരപ്പാടിയിൽ നടന്ന എക്സൈസ് പരിശോധനയിലാണ് പിടികൂടിയത്

കല്‍പ്പറ്റ: മുത്തങ്ങയിൽ 28 ലക്ഷത്തിന്‍റെ കുഴല്‍പ്പണം പിടികൂടി. മലപ്പുറം തിരൂരങ്ങാടി സ്വദേശികളായ കെ സി നൗഫൽ (34), കെ യൂനസ് (37) എന്നിവരാണ് പണവുമായി പിടിയിലായത്. മുത്തങ്ങ തകരപ്പാടിയിൽ എക്സൈസ് ചെക്ക് പോസ്റ്റ് അധികൃതരും, എക്സൈസ് ഇൻ്റലിജൻ്റ്സും സംയുക്തമായി നടത്തിയ പരിശോധനയിലാണ് ഇവരെ പിടികൂടിയത്. പച്ചക്കറി വാഹനത്തിൽ കാബിനിൽ സൂക്ഷിച്ച നിലയിലായിരുന്നു പണം. പിടികൂടിയ പണം ഉള്‍പ്പെടെ പിന്നീട് ബത്തേരി പൊലീസിന് കൈമാറി. മതിയായ രേഖകളില്ലാതെ കൊണ്ടുവന്ന പണമാണ് പിടികൂടിയതെന്ന് അധികൃതര്‍ പറഞ്ഞു.