തിരുവനന്തപുരം:മ്യൂസിയം വളപ്പില്‍ പ്രഭാതസവാരിക്കിറങ്ങിയ യുവതിയെ ആക്രമിച്ച പ്രതിയുടെ രേഖാചിത്രം തയ്യാറാക്കി പൊലീസ്. പരാതിക്കാരി നല്‍കിയ വിവരങ്ങളുടെ അടിസ്ഥാനത്തിലാണ് രേഖാചിത്രം തയ്യാറാക്കിയിരിക്കുന്നത്. സംഭവം നടക്കുന്ന സമയത്ത് കറുത്ത പാന്‍റും വെള്ള ടീഷർട്ടുമാണ് പ്രതി ധരിച്ചിരുന്നത്. തലയിൽ ഒരു മഫ്ളറുമുണ്ടായിരുന്നു എന്നാണ് യുവതിയുടെ മൊഴി.
സംഭവത്തില്‍ പൊലീസിനെതിരെ വ്യാപക വിമര്‍ശനം ഉയര്‍ന്നതിന് പിന്നാലെയാണ് നടപടികള്‍ ഊര്‍ജിതമാക്കാന്‍ തുടങ്ങിയത്. പ്രതിക്കെതിരെ ജാമ്യമില്ലാവകുപ്പുകളും ചുമത്തി. ദേഹത്ത് കയറിപ്പിടിച്ചെന്നും, ലൈംഗിക ചുവയോടെ സംസാരിച്ചെന്നും മൊഴി നല്‍കിയിട്ടും പ്രതിക്ക് ജാമ്യം ലഭിക്കാവുന്ന വകുപ്പുകളാണ് ആദ്യം ചുമത്തിയത്.