കരുവന്നൂര്‍ സഹകരണ ബാങ്ക് ക്രമക്കേട്: സസ്‌പെന്‍ഷന്‍ പിൻവലിച്ചുകൊണ്ടുള്ള ഉത്തരവ് പുറത്തിറക്കി സർക്കാർ

നടപടികളിൽ വീഴ്‌ച സംഭവിച്ചതായി തെളിവില്ലാത്തതിനാൽ ഏഴ് പേരെ സർവീസിൽ വീണ്ടും പ്രവേശിപ്പിക്കും. വീഴ്‌ച വരുത്തിയതായി കണ്ടെത്തിയ ബാക്കി ഏഴ് ഉദ്യോഗസ്ഥരെ ജില്ലയ്‌ക്ക് പുറത്തേക്ക് നിയമിക്കാനും ഉത്തരവില്‍ പറയുന്നു

തൃശൂർ:തൃശൂർ കരുവന്നൂർ സഹകരണ ബാങ്ക് ക്രമക്കേടുമായി ബന്ധപ്പെട്ട് 16 സഹകരണ വകുപ്പ് ഉദ്യോഗസ്ഥർക്കെതിരെ സ്വീകരിച്ച സസ്‌പെൻഷൻ നടപടികൾ പിൻവലിച്ചുകൊണ്ടുള്ള സര്‍ക്കാര്‍ ഉത്തരവ് പുറത്തിറങ്ങി. ഏഴ് പേര്‍ക്കെതിരെ കുറ്റാരോപണങ്ങളിൽ മതിയായ തെളിവുകൾ കണ്ടെത്താത്ത സാഹചര്യത്തിൽ ഇവരെ സർവീസിൽ തിരികെ പ്രവേശിപ്പിക്കും. ബാക്കി ഏഴ് ഉദ്യോഗസ്ഥർ കൃത്യനിർവഹണത്തിൽ വീഴ്‌ച വരുത്തിയതായി സർക്കാർ നിയോഗിച്ച അന്വേഷണ സമിതി കണ്ടെത്തി.

ഇതനുസരിച്ച് ഇവരുടെ സസ്‌പെൻഷൻ പിൻവലിച്ച് വ്യവസ്ഥകൾക്ക് വിധേയമായി തൃശൂർ ജില്ലയ്‌ക്ക് പുറത്ത് നിയമനം നല്‍കാനും ഉത്തരവില്‍ പറയുന്നു. സര്‍വീസില്‍ നിന്നും വിരമിച്ച രണ്ട് പേരില്‍ ഒരാള്‍ക്ക് കൃത്യനിർവഹണത്തിൽ വീഴ്‌ച സംഭവിച്ചതായി കണ്ടെത്തി. ഇയാൾക്കെതിരെയുള്ള അച്ചടക്ക നടപടി തുടരുമെന്നും ഉത്തരവിൽ വ്യക്തമാക്കുന്നു.

ഇവരുടെ പുനർനിയമനങ്ങളുടെ ശുപാർശ സംബന്ധിച്ച് സഹകരണ സംഘം രജിസ്‌ട്രാർ സർക്കാരിനെ അറിയിക്കാനും സഹകരണ വകുപ്പ് പുറപ്പെടുവിച്ച ഉത്തരവിലുണ്ട്. നടപടി നേരിട്ടിരുന്നവർക്ക് ബാങ്കിലെ വീഴ്‌ചകൾ കണ്ടെത്താനോ, സമയബന്ധിതമായി നടപടിയെടുക്കാനോ കഴിഞ്ഞില്ലെന്ന് ചൂണ്ടിക്കാട്ടിയാണ് 2021 ആഗസ്റ്റ് 16ന് ഇവരെ സസ്‌പെൻഡ് ചെയ്‌തത്.

ബാങ്ക് ക്രമക്കേടിനെ കുറിച്ച് അന്വേഷിച്ച ഒമ്പത് അംഗ ഉന്നതതല സമിതിയുടെ ഇടക്കാല റിപ്പോർട്ടിനെ തുടർന്നായിരുന്നു ഇവർക്കെതിരെയുള്ള നടപടി. നടപടി നേരിട്ടവർ സർക്കാരിന് നൽകിയ പരാതിയിൽ പരിശോധനയും അന്വേഷണവും വിശദമായ വാദവും പൂർത്തീകരിച്ച ശേഷമാണ് സസ്‌പെന്‍ഷന്‍ പിൻവലിക്കുന്ന തീരുമാനത്തില്‍ എത്തിയത്. അതേസമയം സസ്‌പെൻഷന്‍ പിന്‍വലിച്ച നടപടിയില്‍ പ്രധിഷേധം ശക്തമാണ്.