തൃശ്ശൂര്‍: ചാലക്കുടി നഗരസഭയിലെ വനിതാ കൗൺസിലർക്ക് സമ്പർക്കത്തിലൂടെ കൊവിഡ് സ്ഥിരീകരിച്ചു. ഇവർ ഉൾപ്പെടെ ആകെ 17 പേർക്കാണ് തൃശൂർ ജില്ലയിൽ ഇന്ന് കൊവിഡ് സ്ഥിരീകരിച്ചത്. അതേസമയം കൊവിഡ് ബാധിതനായ കെ.എസ്.ആർ.ടി.സി ഗുരുവായൂർ ഡിപ്പോയിലെ കണ്ടക്ടറുടെ വിശദമായ റൂട്ട് മാപ്പ് ജില്ലാ ഭരണകൂടം പുറത്ത് വിട്ടു. ജൂൺ 15, 22, 25 ദിവസങ്ങളിലാണ് രോഗ ബാധിതനായ കണ്ടക്ടർ ഡ്യൂട്ടി ചെയ്തിട്ടുള്ളത്.
മലപ്പുറം സ്വദേശിയായ ഇദ്ദേഹവുമായി സമ്പർക്കമുണ്ടായവർ നിരീക്ഷണത്തിൽ പോകണം എന്ന് ആരോഗ്യ വകുപ്പ് നിർദേശിച്ചിട്ടുണ്ട്. തൃശൂർ ജില്ലയിൽ കൊവിഡ് ബാധിച്ച് ഇപ്പോൾ ചികിത്സയിൽ കഴിയുന്നവരുടെ എണ്ണം 154 ആയി. ഇന്ന് അഞ്ച് പേർ കൂടി രോഗമുക്തരായിട്ടുണ്ട്. നേരത്തെ രോഗം സ്ഥിരീകരിച്ച ജീവനക്കാരനിൽ നിന്നുള്ള സമ്പർക്കം മൂലമാണ് ചാലക്കുടി നഗരസഭാ കൗൺസിലർക്ക് രോഗപ്പകർച്ച ഉണ്ടായത്.