തിരുവനന്തപുരം: 50 കോടി രൂപ തട്ടിയെടുത്ത ടോട്ടൽ ഫോർ യു നിക്ഷേപ തട്ടിപ്പ് കേസിൻ്റെ വിചാരണയ്ക്ക് തുടർച്ചയായി ഹാജരാകാതിരുന്ന സാക്ഷിക്ക് കോടതിയുടെ അറസ്റ്റ് വാറണ്ട്. തിരുവനന്തപുരം മണക്കാട് കമലേശ്വരം സ്വദേശി അഷ്‌റഫിനാണ് വാറണ്ട് ലഭിച്ചത്. തിരുവനന്തപുരം അഡീഷണല്‍ ചീഫ് ജുഡീഷ്യൽ മജിസ്‌ട്രേറ്റ് കോടതിയുടേതാണ് ഉത്തരവ്.
പത്ത് വർഷം പഴക്കമുള്ള കേസിൻ്റെ വിചാരണ കൊവിഡിനെ തുടര്‍ന്ന് മുടങ്ങി കിടക്കുകയായിരുന്നു. വിചാരണ നടപടികൾ കോടതിയില്‍ വീണ്ടും ആരംഭിച്ചതോടെ കേസ് വിചാരണയുടെ അവസാന ഘട്ടത്തിലാണ്. ഈ സാഹചര്യത്തിലാണ് മണക്കാടുള്ള സാക്ഷി കോടതിയില്‍ തുടര്‍ച്ചയായി ഹാജരാകാത്തത് കോടതിയെ ചൊടിപ്പിച്ചത്.