തിരുവനന്തപുരം: മുഖ്യമന്ത്രി പിണറായി വിജയൻ വിളിച്ച സംസ്ഥാന പൊലീസിലെ ഉദ്യോഗസ്ഥരുടെ സമഗ്രമായ യോഗം ഞായറാഴ്‌ച വൈകിട്ട് മൂന്നരയ്ക്ക് നടക്കും. ഓൺലൈൻ വഴിയാണ് യോഗം നടക്കുക. ഗൂഗിള്‍ മീറ്റ് വഴി ചേരുന്ന യോഗത്തില്‍ എസ്എച്ച്ഒ മുതല്‍ സംസ്ഥാന പൊലീസ് മേധാവി വരെ പങ്കെടുക്കണമെന്നാണ് മുഖ്യമന്ത്രിയുടെ നിര്‍ദേശം.
മാവുങ്കല്‍, ഹണിട്രാപ്പ് വിവാദങ്ങളടക്കം പൊലീസിനെതിരെ ഉയര്‍ന്ന ഗുരുതര ആരോപണങ്ങളുടെ പശ്ചാത്തലത്തിലാണ് യോഗം. സംസ്ഥാന പൊലീസില്‍ അടുത്തിടെ ഉയര്‍ന്ന ഹണിട്രാപ്പ് അടക്കമുള്ള വിവാദ വിഷയങ്ങളിലെ ഉദ്യോഗസ്ഥരുടെ ഇടപെടല്‍ സേനയ്ക്ക് നാണക്കേടുണ്ടാക്കിയിരുന്നു. കൊച്ചിയിലെ പുരാവസ്‌തു തട്ടിപ്പ് കേസില്‍ ക്രൈം ബ്രാഞ്ച് അറസ്റ്റ് ചെയ്‌ത മോന്‍സണ്‍ മാവുങ്കലുമായി ഉന്നത പൊലീസ് ഉദ്യോഗസ്ഥര്‍ക്കടക്കം നേരിട്ട് ബന്ധമുള്ളതായുള്ള വിവരങ്ങള്‍ പുറത്തു വന്ന പശ്ചാത്തലത്തില്‍ കൂടിയാണ് യോഗം.