'ആശുപത്രിയിലെ നിയമനത്തിനുള്ള കത്ത് എന്‍റേത്'; ജില്ല സെക്രട്ടറിയ്ക്ക്‌ കൈമാറിയിട്ടില്ലെന്ന് ഡിആര്‍ അനില്‍

നഗരസഭയിലേക്ക് തൊഴില്‍ നിയമനത്തിനുള്ള മേയര്‍ ആര്യ രാജേന്ദ്രന്‍റെ കത്ത് പുറത്തുവന്നതിന് പിന്നാലെയാണ് രണ്ടാമത്തെ കത്തും ചോര്‍ന്നത്. എസ്എടി ആശുപത്രിയിലെ നിയമനവുമായി ബന്ധപ്പെട്ടെ കത്തിനെക്കുറിച്ചാണ് സിപിഎം പാർലമെൻ്ററി പാർട്ടി നേതാവ് ഡിആർ അനിലിന്‍റെ വിശദീകരണം

തിരുവനന്തപുരം : എസ്എടി ആശുപത്രിയിൽ കുടുംബശ്രീ പ്രവർത്തകരുടെ നിയമനവുമായി ബന്ധപ്പെട്ട് പുറത്തുവന്ന കത്ത് താൻ തയ്യാറാക്കിയതാണെന്ന് നഗരസഭയിലെ സിപിഎം പാർലമെൻ്ററി പാർട്ടി നേതാവ് ഡിആർ അനിൽ. എന്നാൽ, ഈ കത്ത് ജില്ല സെക്രട്ടറി ആനാവൂർ നാഗപ്പന് കൈമാറിയിട്ടില്ല. ആശുപത്രിയിൽ എത്തുന്നവർക്ക് സഹായകരമായ കാത്തിരിപ്പ് കേന്ദ്രം പ്രവർത്തന സജ്ജമാക്കുന്നതിനാണ് നിയമനം നടത്തുന്നതെന്നും അദ്ദേഹം പറഞ്ഞു.

ഇതിനായി കുടുംബശ്രീയെ സമീപിച്ചിട്ടുണ്ട്. വേഗത്തിൽ നിയമനം നടത്താനാണ് ജില്ല സെക്രട്ടറിക്ക് കൂടി കത്ത് തയ്യാറാക്കിയത്. എന്നാൽ, ഇത്തരം കത്ത് നൽകുന്നത് ശരിയായ നിലപാടല്ലെന്ന് ബോധ്യമായതിനാലാണ് നൽകാതിരുന്നത്. പിൻവാതിൽ നിയമനം പാർട്ടിയുടെ നിലപാടല്ല. ഈ കത്ത് എങ്ങനെ പുറത്തുവന്നുവെന്നത് സംബന്ധിച്ച് പൊലീസ് അന്വേഷിക്കുന്നുണ്ട്.

ഈ അന്വേഷണത്തിൽ എല്ലാം പുറത്തുവരും. മേയറുടെ പേരിലുള്ള കത്ത് വ്യാജമാണ്. ഇതിന് പിന്നിൽ പ്രവർത്തിച്ചവരെ നിയമത്തിനുമുന്നിൽ എത്തിക്കുമെന്നും ഡിആർ അനിൽ പറഞ്ഞു.