കേരളത്തിൽ അതീവ ഗുരുതര സാമ്പത്തിക പ്രതിസന്ധി: രമേശ് ചെന്നിത്തല

സന്ദീപാനന്ദ ഗിരിയുടെ ആശ്രമം കത്തിച്ച പ്രതികളെ എന്തുകൊണ്ട് അറസ്റ്റ് ചെയ്യുന്നില്ലെന്ന് മുഖ്യമന്ത്രി മറുപടി പറയണം- ചെന്നിത്തല പറഞ്ഞു.

മൂന്നാഴ്ചയായി കേരളത്തിലെ ട്രഷറികളിൽ ഒരു ലക്ഷത്തിനുമുകളിലുള്ള ബില്ലുകൾ മാറാതിരിക്കുകയാണെന്നും കരാറുകാർക്ക് 1200 കോടി കുടിശിക മുടങ്ങിക്കിടക്കുകയാണെന്നും പ്രതിപക്ഷ നേതാവ് രമേശ് ചെന്നിത്തല ആരോപിച്ചു. 24000 കോടി രൂപയാണ് ആകെ പിരിഞ്ഞു കിട്ടാനുള്ളത്. സാമ്പത്തിക കെടുകാര്യസ്ഥതയാണ് ഇതിന് പിന്നിൽ. സംസ്ഥാനം കനത്ത സാമ്പത്തിക പ്രതിസന്ധിയിലാണ് കടന്നുപോകുന്നെന്നാണ് ഇത് സൂചിപ്പിക്കുന്നതെന്നും ചെന്നിത്തല വ്യക്തമാക്കി.

സംസ്ഥാനത്തെ ക്രമസമാധാന നില ആകെ തകർന്നിരിക്കുകയാണ്. ഗുണ്ടാ മാഫിയകളുടെ അക്രമണം വർധിക്കുന്ന സാഹചര്യത്തിലും പൊലീസിൽ സ്ഥലം മാറ്റം മുറക്ക് നടക്കുകയാണെന്നും ചെന്നിത്തല പറഞ്ഞു. കൊലക്കേസിൽ ഉൾപ്പെട്ടതിനാൽ പി ജയരാജനെയും വി രാജേഷിനെയും പാർട്ടി പദവികളിൽ നിന്നും ഒഴിവാക്കണമെന്നും ചെന്നിത്തല വ്യക്തമാക്കി. കേരളത്തിന്‍റെ പൊതുമനസ് ജനങ്ങൾക്കൊപ്പമാണെന്നും സർവേകളിൽ പൂർണമായും വിശ്വസിക്കുന്നില്ലെന്നും കന്‍റോണ്‍മെന്‍റ് ഹൗസില്‍ വച്ച് അദ്ദേഹം മാധ്യമങ്ങളോട് വ്യക്തമാക്കി.