തിരുവനന്തപുരം: ഒൻപത് വയസുകാരനെ പീഡിപ്പിച്ച കേസിൽ മധ്യവയസ്‌കന് 20 വർഷം കഠിന തടവും 50,000 രൂപ പിഴയും വിധിച്ച് തിരുവനന്തപുരം അതിവേഗ സ്പെഷ്യൽ കോടതി. കാലടി മരുതൂർക്കടവ് സ്വദേശി ജയകുമാറിനെയാണ് ജഡ്‌ജി ആർ. ജയകൃഷ്‌ണൻ ശിക്ഷിച്ചത്. പിഴ അടച്ചില്ലെങ്കിൽ ആറ് മാസം കൂടുതൽ തടവ് അനുഭവിക്കണമെന്നും വിധിയിൽ പറയുന്നു.
2019 ജൂൺ 27 വൈകിട്ട് ആറോടെയാണ് കേസിനാസ്‌പദമായ സംഭവം നടന്നത്. ഓട്ടോ ഡ്രൈവറായ പ്രതിയുടെ വീടിൻ്റെ മുകളിലത്തെ നിലയിലാണ് കുട്ടിയും വീട്ടുകാരും വാടകയ്ക്ക് താമസിച്ചിരുന്നത്. ട്യൂഷൻ കഴിഞ്ഞ് മൂന്നാം ക്ലാസുകാരനായ കുട്ടി തിരിച്ചുവരുമ്പോഴാണ് പീഡനം നടന്നത്.
കുട്ടിയുടെ അച്ഛന് വിദേശത്തായിരുന്നു ജോലി. പ്രതിയെ ഭയന്ന് കുട്ടി അമ്മയോട് വിവരം പറഞ്ഞില്ല. ഒരാഴ്‌ചയ്ക്ക് ശേഷം വീട്ടുകാർ പുറത്തുപോകാൻ തുടങ്ങവെ കുട്ടിയോട് പ്രതിയുടെ വീട്ടിൽ നിൽക്കാൻ വീട്ടുകാർ ആവശ്യപ്പെട്ടു. തുടർന്ന് കുട്ടി കരയാൻ തുടങ്ങി. ഇതിനെ സംബന്ധിച്ച് ചോദിച്ചപ്പോഴാണ് കുട്ടി പീഡന വിവരം പുറത്ത് പറയുന്നത്.