ഓപ്പറേഷന്‍ ആഗ് : സംസ്ഥാനത്താകെ അരിച്ചുപെറുക്കി പൊലീസ്, 2057 ഗുണ്ടകൾക്കെതിരെ നടപടി

തിരുവനന്തപുരം ജില്ലയിലാണ് ഏറ്റവും കൂടുതൽ പേർക്കെതിരെ നടപടി സ്വീകരിച്ചതെന്നും ഓപ്പറേഷൻ ആഗിന്‍റെ ഭാഗമായി പിടികിട്ടാപ്പുള്ളികൾ ഉൾപ്പടെ അറസ്റ്റിലായിട്ടുണ്ടെന്നും ജില്ല പൊലീസ് കമ്മിഷണർ നാഗരാജു ഐപിഎസ്

തിരുവനന്തപുരം : സംസ്ഥാന വ്യാപകമായി ഗുണ്ടകൾക്കെതിരെ പൊലീസ് നടപടി. വിവിധ ജില്ലകളിലായി 2507 ഗുണ്ടകൾക്കെതിരെയാണ് നടപടി സ്വീകരിച്ചത്. സംസ്ഥാനത്തെ റേഞ്ച് ഐജിമാരുടെയും ജില്ല പൊലീസ് മേധാവിമാരുടെയും നേതൃത്വത്തിൽ ഓപ്പറേഷൻ ആഗിന്‍റെ ഭാഗമായാണിത്.

തിരുവനന്തപുരത്താണ് ഏറ്റവും കൂടുതൽ പേർ വലയിലായത്. ഇവിടെ 113 കുറ്റവാളികളെ അറസ്റ്റ് ചെയ്‌തുവെന്ന് ജില്ല പൊലീസ് കമ്മിഷണർ നാഗരാജു ഐപിഎസ് വ്യക്‌തമാക്കി. ഓപ്പറേഷൻ ആഗിന്‍റെ ഭാഗമായി പിടികിട്ടാപ്പുള്ളികൾ ഉൾപ്പടെ പിടിയിലായിട്ടുണ്ട്. നടപടി അറസ്റ്റിലും റിമാൻഡിലും മാത്രമായി ഒതുക്കില്ല.

360 ഡിഗ്രിയിൽ നടക്കുന്ന ഓപ്പറേഷൻ ആഗ് ഇനിയും തുടരും. എല്ലാ എൻഫോഴ്സ്മെന്‍റ് വകുപ്പുകളെയും ഏകോപിപ്പിച്ച് കൊണ്ടായിരിക്കും ഓപ്പറേഷൻ ആഗ് തുടരുക. പിടിയിലായവരുടെ വിവരങ്ങൾ കൃത്യമായി അപ്ഡേറ്റ് ചെയ്യും. എന്നാൽ ചെറിയ കുറ്റകൃത്യങ്ങളിൽപ്പെടുന്നവർക്ക് ഭാവിയിൽ തിരുത്താനുള്ള അവസരം ഒരുക്കുമെന്നും കമ്മിഷണർ പറഞ്ഞു.

പിടികൂടിയവരിൽ 62 പേർ ക്രിമിനൽ പശ്ചാത്തലം ഉള്ളവരാണ്. കുപ്രസിദ്ധ ഗുണ്ട അനൂപ് ആന്‍റണി, അന്തർസംസ്ഥാന മോഷ്‌ടാവ് ജാഫർ എന്നിവരും ഇതിൽ ഉൾപ്പെടുന്നു. അതേസമയം മ്യൂസിയം പൊലീസ് സ്റ്റേഷൻ പരിധിയിൽ കഴിഞ്ഞ ദിവസം സ്ത്രീക്ക് എതിരെ ആക്രമണം ഉണ്ടായ സാഹചര്യത്തില്‍ ഇത്തരം സംഭവങ്ങള്‍ ഇനി ആവർത്തിക്കാതിരിക്കാൻ നടപടികൾ സ്വീകരിക്കുമെന്നും കമ്മിഷണർ പറഞ്ഞു.

പരാതിപ്പെടുന്നതിൽ താമസം ഉണ്ടാകുന്നത് അന്വേഷണത്തെ ബാധിക്കുന്നുണ്ട്. സ്ത്രീ സുരക്ഷ മൊബൈല്‍ ആപ്പായ 'നിർഭയ' വനിതകള്‍ എല്ലാവരും ഡൗൺലോഡ് ചെയ്യണമെന്നും നാഗരാജു ആവശ്യപ്പെട്ടു.

സ്ത്രീകൾക്കെതിരെയുള്ള അതിക്രമം തടയാനായി പിങ്ക് പൊലീസിന്‍റെ പെട്രോളിങ് സമയം ദീർഘിപ്പിക്കും. രാത്രി സമയങ്ങളിൽ പിങ്ക് പൊലീസിന്‍റെ പ്രത്യേകം പട്രോളിങ്ങിനുള്ള സംവിധാനവും ഒരുക്കും. വിഷയത്തിൽ നേരത്തെ വനിത കമ്മിഷൻ സ്വമേധയാ കേസ് എടുത്തിരുന്നു.

അരിച്ച് പെറുക്കി പൊലീസ് : ഇന്നലെ രാത്രി നടന്ന പരിശോധനയിൽ 26 വാറണ്ട് പ്രതികൾ, 13 പിടികിട്ടാപ്പുള്ളികൾ എന്നിവര്‍ ഉൾപ്പടെ കോഴിക്കോട് റൂറൽ പരിധിയിൽ 182 പേരും നഗരത്തിൽ 90 പേരും കരുതൽ തടങ്കലിലായി. പത്തനംതിട്ടയിൽ 32 പേരെ കസ്റ്റഡിയിലെടുത്തു. ഇവരുടെ വിവരങ്ങൾ ശേഖരിച്ച ശേഷം വിട്ടയച്ചു.

കോട്ടയത്ത് 165 വീടുകളിലാണ് ഇന്നലെ രാത്രി പരിശോധന നടന്നത്. 90 കേസുകൾ രജിസ്റ്റർ ചെയ്‌തു. 133 പേരെ അറസ്റ്റ് ചെയ്‌തിട്ടുമുണ്ട്. കാപ്പ ചുമത്തി നാടുകടത്തിയ 5 ഗുണ്ടകളും ഇതിൽ ഉൾപ്പെടുന്നു. തൃശൂർ റൂറലിൽ 150 പേരെ കരുതൽ തടങ്കലിൽ പ്രവേശിപ്പിക്കുകയും 32 വാറണ്ട് പ്രതികളെ പിടികൂടുകയും ചെയ്‌തു.

കൊല്ലം റൂറലിൽ 104 കേസുകൾ രജിസ്റ്റർ ചെയ്‌ത് 110 പേരെ അറസ്റ്റ് ചെയ്‌തു. കൊല്ലം സിറ്റിയിൽ 30 കേസുകളാണ് രജിസ്റ്റര്‍ ചെയ്‌തത്. 51 പേരെ പിടികൂടി. ആലപ്പുഴ - 64 കേസുകൾ 134 - അറസ്റ്റ്. ഇടുക്കിയിൽ 99 പേരെയും പിടികൂടി.

എറണാകുളം റൂറല്‍ - 37 കേസുകൾ -107 പേര്‍, എറണാകുളം സിറ്റി - 49 കേസുകൾ ,105 പേര്‍ മലപ്പുറം - 53 കേസുകൾ, 68 പേര്‍ - എന്നിങ്ങനെയാണ് പിടിയിലായത്.

കണ്ണൂർ റൂറല്‍ - 127 കേസുകൾ, 135 പേര്‍,കണ്ണൂർ സിറ്റി - 130 കേസുകൾ, 136 പേര്‍, കാസർഗോഡ് - 85 കേസുകൾ , 111 പേര്‍, എന്നിങ്ങനെയും അറസ്റ്റിലായി.

ഗുണ്ടകളെ കുരുക്കി 'ആഗ്': സ്പെഷ്യൽ ബ്രാഞ്ചിൽ ഉൾപ്പെട്ട ഉദ്യോഗസ്ഥരുടെ ഗുണ്ട മണ്ണുമാഫിയ ബന്ധം പുറത്തുവന്ന പശ്ചാത്തലത്തിൽ വിഷയത്തിൽ പൊലീസിന്‍റെ ഇന്‍റലിജൻസ് വിഭാഗത്തിനോട് അന്വേഷണം നടത്താൻ ഡിജിപി ആവശ്യപ്പെട്ടിരുന്നു.

ഫെബ്രുവരി 13ന് സംസ്ഥാന പൊലീസ് മേധാവി അനില്‍കാന്ത് വിളിച്ചുചേർത്തിരിക്കുന്ന ജില്ല പൊലീസ് മേധാവിമാരുടെ യോഗത്തിൽ ഇതിന്‍റെ റിപ്പോർട്ട് ഇന്‍റലിജൻസ് ഡിജിപി അവതരിപ്പിക്കും. കഴിഞ്ഞമാസം ഡിജിപിയുടെ മേൽനോട്ടത്തിൽ നടന്ന റേഞ്ച് ഐജിമാരുടെയും ജില്ല പൊലീസ് മേധാവിമാരുടെയും യോഗത്തിൽ ആയിരുന്നു 'ഓപ്പറേഷൻ ആഗ്' എന്ന പേരിൽ സാമൂഹ്യവിരുദ്ധരെ പിടികൂടാനുള്ള മിന്നൽ പരിശോധന നടത്താൻ തീരുമാനമെടുത്തത്.

'ആക്‌സിലറേറ്റഡ് ആക്ഷൻ എഗൈൻസ്റ്റ് ഗൂൺസ്' എന്നതിന്‍റെ ചുരുക്കപ്പേരാണ് ഹിന്ദിയിൽ തീ എന്നർഥം വരുന്ന ആഗ്. ഗുണ്ടകളുടെയും സാമൂഹ്യ വിരുദ്ധരുടെയും പ്രൊഫൈൽ രൂപീകരിച്ചതിന് ശേഷമാണ് പൊലീസ് സംസ്ഥാനമൊട്ടാകെ മിന്നൽ പരിശോധന നടത്തിയത്.