ശബരിമല സ്ത്രീപ്രവേശനവുമായി ബന്ധപ്പെട്ട് ഓര്‍ഡിനൻസ് ഇറക്കണമെങ്കിൽ സംസ്ഥാന സർക്കാരും നിയമസഭയും ആവശ്യപ്പെടട്ടെ എന്ന് തിരുവനന്തപുരത്തെ ബിജെപി സ്ഥാനാർഥി കുമ്മനം രാജശേഖരൻ. ഈ തെരഞ്ഞെടുപ്പിൽ ഇടത് മുന്നണി ദയനീയമായി പരാജയപ്പെടുമെന്നും അതുകൊണ്ടാണ് ശബരിമല ഓര്‍ഡിനന്‍സിന്‍റെ ഉത്തരവാദിത്വം ബിജെപിയുടെയും ആർഎസ്എസിന്‍റെയും മേൽ ആരോപിക്കുന്നതെന്നും കുമ്മനം ഇടിവി ഭാരതിനോട് വ്യക്തമാക്കി.
കേരളം വിട്ടുകഴിഞ്ഞാൽ കോൺഗ്രസും കമ്മ്യൂണിസ്റ്റും ഒരു കൊടിക്ക് കീഴിലാണ് പ്രവർത്തിക്കുന്നത്. നാളെ കേരളത്തിലും ആ സഖ്യം വരില്ലെന്ന് എന്തുറപ്പാണുള്ളത്. ഈ സാഹചര്യത്തില്‍ കോൺഗ്രസും ബിജെപിയും തമ്മിൽ സഖ്യത്തിലാണെന്ന കമ്മ്യൂണിസ്റ്റ് പാർട്ടിയുടെ ആരോപണം ആരാണ് കൈക്കൊള്ളുകയെന്നും കുമ്മനം ചോദിച്ചു. കൃഷി, വാണിജ്യം, വ്യവസായം, വിദ്യാഭ്യാസം, ആരോഗ്യം തുടങ്ങി എല്ലാ മേഖലകളിലുമുള്ള വിദഗ്ധരുമായി ചർച്ചകൾ നടത്തിയിട്ടുണ്ട്. പുരോഗമനത്തെ മുൻ നിർത്തിയാവും പ്രചാരണത്തിനിറങ്ങുകയെന്നും കുമ്മനം പറഞ്ഞു.
