തിരുവനന്തപുരം: ഇന്ധന സെസ് വര്‍ധിപ്പിക്കാനുള്ള സംസ്ഥാന സര്‍ക്കാരിന്‍റെ തീരുമാനത്തിനെതിരെയുള്ള പ്രതിഷേധം ശക്തമാക്കാന്‍ പ്രതിപക്ഷം. നിയമസഭയ്‌ക്കകത്തും പുറത്തും സമരപരിപാടികള്‍ നടത്താനാണ് തീരുമാനം. പ്രതിഷേധങ്ങളുടെ ഭാഗമായി എംഎല്‍എമാരുടെ സത്യാഗ്രഹം ഉള്‍പ്പടെ നടത്താനും യുഡിഎഫ് ആലോചിക്കുന്നുണ്ട്.
ഇന്ന് 12 മണിക്ക് ചേരുന്ന യുഡിഎഫ് കക്ഷി നേതാക്കളുടെ യോഗത്തിന് ശേഷമാകും സമരപരിപാടികളെ കുറിച്ചുള്ള അന്തിമ തീരുമാനം കൈക്കൊള്ളുക. തുടര്‍ന്ന് ബജറ്റ് ചര്‍ച്ചകള്‍ ആരംഭിക്കുമ്പോള്‍ പ്രതിപക്ഷ നേതാവ് സമര പ്രഖ്യാപനം നടത്തും. സഭയ്‌ക്ക് പുറത്തേക്കും സമരം ശക്തമാക്കാന്‍ പ്രതിപക്ഷം തീരുമാനിച്ചിട്ടുണ്ട്.