തിരുവനന്തപുരം : തൊഴിലുറപ്പ് തൊഴിലാളികൾക്ക് 1000 രൂപ വീതം ഉത്സവബത്ത നൽകുമെന്ന് ധനമന്ത്രി കെ എൻ ബാലഗോപാൽ. 4.6 ലക്ഷം പേർക്കാണ് ബോണസ് നൽകുകയെന്നും ധനമന്ത്രി വാർത്താസമ്മേളനത്തിൽ അറിയിച്ചു. മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിലും അയ്യങ്കാളി നഗര തൊഴിലുറപ്പ് പദ്ധതിയിലും 100 പ്രവൃത്തി ദിനങ്ങൾ പൂർത്തിയാക്കിയ എല്ലാ തൊഴിലുറപ്പ് തൊഴിലാളികൾക്കും ഉത്സവബത്ത ലഭിക്കും. 46 കോടി രൂപ ഇതിനായി അനുവദിച്ചു.
അതേസമയം ജനകീയ ഹോട്ടലുകളുടെ സബ്‌സിഡി എടുത്ത് കളഞ്ഞിട്ടില്ലെന്നും ചില നിയന്ത്രണങ്ങൾ കൊണ്ടുവരിക മാത്രമാണ് ചെയ്‌തതെന്നും മന്ത്രി പറഞ്ഞു. അനിയന്ത്രിതമായി പാഴ്‌സൽ പോകുന്ന സാഹചര്യമുണ്ടായി. പദ്ധതി പ്രഖ്യാപിച്ചത് കൊവിഡ് കാലത്തെ ഉദേശിച്ചാണെന്നും മന്ത്രി വ്യക്തമാക്കി.
ഓണച്ചെലവിനായി 19,000 കോടിയോളം രൂപ ആവശ്യമായി വരും. ഈ തുക കണ്ടെത്തി നൽകിക്കൊണ്ടിരിക്കുകയാണെന്നും മന്ത്രി അറിയിച്ചു. 4000 രൂപ വീതം സർക്കാർ ജീവനക്കാർക്ക് ബോണസായി നൽകും. ബോണസിന് അർഹത ഇല്ലാത്തവർക്ക് ഉത്സവ ബത്തയായി 2,750 രൂപ നൽകും. ആവശ്യപ്പെടുന്ന സർക്കാർ ജീവനക്കാർക്ക് 20,000 രൂപ മുൻകൂറായി അനുവദിക്കും. സർവീസ് പെൻഷൻകാർക്കും പങ്കാളിത്ത പെൻഷൻ പദ്ധതി പ്രകാരം വിരമിച്ച ജീവനക്കാർക്കും പ്രത്യേക ഉത്സവബത്തയായി 1000 രൂപ നൽകും.
കെഎസ്‌ആർടിസിക്ക് 70 കോടി രൂപ നൽകും. ലോട്ടറി മേഖലയിൽ പെൻഷൻ 25 കോടി അനുവദിച്ചു. സിവിൽ സപ്ലൈസ് വകുപ്പ് രണ്ട് ഘട്ടമായി പണം നൽകി. 70 കോടി രൂപ സപ്ലൈക്കോയ്‌ക്കും അനുവദിച്ചിട്ടുണ്ട്. നെൽ കർഷകരുടെ കുടിശിക ഓണത്തിന് മുമ്പ് കൊടുത്ത് തീർക്കുമെന്നും മന്ത്രി കൂട്ടിച്ചേർത്തിരുന്നു.