തിരുവനന്തപുരം: അന്തരിച്ച മുതിർന്ന മാധ്യമപ്രവർത്തകൻ ഇ.സോമനാഥിനെ അനുസ്‌മരിച്ച് തലസ്ഥാനം. മുതിർന്ന രാഷ്ട്രീയ നേതാക്കളും മാധ്യമ പ്രവർത്തകരും പങ്കെടുത്ത ചടങ്ങ് മുഖ്യമന്ത്രി പിണറായി വിജയൻ ഉദ്ഘാടനം ചെയ്‌തു. കെ.ആർ ചുമ്മാറിനു ശേഷം നിയമസഭ അവലോകനം ഒരേസമയം നർമ്മമധുരവും തീക്ഷ്‌ണവുമാക്കിയത് ഇ.സോമനാഥ് ആയിരുന്നുവെന്ന് മുഖ്യമന്ത്രി അനുസ്‌മരിച്ചു.
എല്ലാം കൈയടിച്ചു പാസാക്കുന്നതിനു പകരം വിയോജിച്ചു കൊണ്ട് പരിശോധിക്കുന്ന രീതിയായിരുന്നു സോമനാഥിൻ്റേത്. തൻ്റെ രാഷ്ട്രീയ ജീവിതത്തിൽ സോമനാഥും അദ്ദേഹത്തിൻ്റെ മാധ്യമവും തലോടലിനു പകരം താഡനങ്ങളാണ് നൽകിയത്. എന്നാൽ വിയോജിക്കുമ്പോൾ പോലും വെറുക്കുന്നില്ലെന്ന് സോമനാഥ് തെളിയിച്ചുവെന്നും മുഖ്യമന്ത്രി ചടങ്ങിൽ പറഞ്ഞു.