സംസ്ഥാനത്ത് ലഹരി കേസുകളിൽ വര്‍ധന, എംഡിഎംഎയും ഹാഷിഷ്‌ ഓയിലും കേരളത്തില്‍ സുലഭം

കഴിഞ്ഞ രണ്ട് വര്‍ഷത്തെ കണക്കുകള്‍ പ്രകാരം സംസ്ഥാനത്ത് ലഹരി കേസുകളിൽ വൻവർധന. കഞ്ചാവ് കൂടാതെ എംഡിഎംഎയും ഹാഷിഷ്‌ ഓയിലും കേരളത്തില്‍ സുലഭമാണെന്ന് കണക്കുകള്‍ പറയുന്നു

തിരുവനന്തപുരം: സംസ്ഥാനത്ത് ലഹരി കേസുകളിൽ വൻ വർധന. കഴിഞ്ഞ രണ്ട് വര്‍ഷത്തെ കണക്കുകള്‍ പ്രകാരമാണ് കേസുകളില്‍ വര്‍ധന. കഞ്ചാവ് കൂടാതെ മാരക മയക്കുമരുന്നായ എംഡിഎംഎ, ഹാഷിഷ് ഓയിൽ തുടങ്ങിയവയും സംസ്ഥാനത്ത് വ്യാപകമാണെന്നാണ് കണക്കുകൾ വ്യക്തമാക്കുന്നത്.

2021 ൽ ആകെ രജിസ്റ്റർ ചെയ്‌ത കേസുകളെക്കാൾ മൂന്നിരട്ടി കേസുകൾ ഈ വർഷം ഇതുവരെ രജിസ്റ്റർ ചെയ്‌തിട്ടുണ്ട്.

ലഹരിയുമായി ബന്ധപ്പെട്ട കേസുകൾ (ഓഗസ്റ്റ് 29 വരെയുള്ള കണക്കുകൾ പ്രകാരം):

വര്‍ഷം	റിപ്പോര്‍ട്ട് ചെയ്‌ത കേസുകള്‍
2020	4,650
2021	5,334
2022	16,128

ലഹരി കേസുമായി ബന്ധപ്പെട്ട് അറസ്റ്റിലായവരില്‍ ഏറെയും. 21 വയസിൽ താഴെയുള്ളവരാണ് കേസുകളിൽ പിടിയിലാകുന്നത് എന്നതും ആശങ്കപ്പെടുത്തുന്നതാണ്.

അറസ്റ്റിലായവരുടെ കണക്കുകൾ:

വര്‍ഷം	അറസ്റ്റിലായവര്‍
2020	5,674
2021	6,704
2022	17,834

ലഹരിക്കായി എത്തിക്കുന്നതിൽ ഭൂരിഭാഗവും കഞ്ചാവാണ്. എന്നാൽ മുൻ വർഷങ്ങളിൽ നിന്ന് വ്യത്യസ്‌തമായി എംഡിഎംഎയും ഹാഷിഷ് ഓയിലും കേരളത്തിൽ സുലഭമായി ലഭിക്കുന്നു എന്നാണ് കണക്കുകൾ വ്യക്തമാക്കുന്നത്.

ഈ വർഷം പിടികൂടിയ ലഹരി വസ്‌തുക്കള്‍:

ലഹരി വസ്‌തു	അളവ്(കിലോഗ്രാമില്‍)
കഞ്ചാവ്	1,340
എംഡിഎംഎ	6.7
ഹാഷിഷ് ഓയിൽ	23.4

മുഖ്യമന്ത്രി നിയമസഭയെ അറിയിച്ച ഈ കണക്കുകൾ ഏറെ ആശങ്കപ്പെടുത്തുന്നതാണ്. ഈ കണക്കുകൾ പിടികൂടിയതും കണ്ടെത്തിയതുമായ കേസുകളുടെതാണ്. എന്നാൽ കോടികൾ മറിയുന്ന വമ്പൻ മാഫിയകൾ നടത്തുന്ന ഈ ലഹരി വ്യവസായത്തിന്‍റെ കണക്കുകൾ ഇതിലും ഏറെ വലുതാകാനാണ് സാധ്യതയെന്ന് അധികൃതര്‍ പറയുന്നത്.