തിരുവനന്തപുരം :കിൻഫ്ര പാർക്കിലെ തീപിടിത്തത്തില്‍ വിർമശനവുമായി ഫയർഫോഴ്സ് മേധാവി ബി സന്ധ്യ. തീ അണയ്‌ക്കാനുള്ള സജ്‌ജീകരണങ്ങളോ അഗ്നിശമനയുടെ എൻ ഒ സിയോ കെട്ടിടത്തിന് ഉണ്ടായിരുന്നില്ലെന്ന് ഫയർഫോഴ്സ് മേധാവി മാധ്യങ്ങളോട് പറഞ്ഞു. എന്നാൽ ഇത് ആരുടെ വീഴ്‌ചയാണെന്ന് അറിയില്ല. ഫോറൻസിക് റിപ്പോർട്ട് അടക്കം ലഭിച്ചാൽ മാത്രമേ കിൻഫ്രയിൽ ഉണ്ടായ തീപിടിത്തത്തിൽ അന്വേഷണം ആരംഭിക്കാനാകൂ. ഞങ്ങളുടെ ഒരു ഉദ്യോഗസ്ഥനെ നഷ്‌ടമായത് വളരെ ദുഃഖകരമായ ഒരു സംഭവമാണെന്നും ബി സന്ധ്യ പറഞ്ഞു.
എൻഫോഴ്‌സ്‌മെന്‍റ് ഫയർഫോഴ്‌സിൻ്റെ ചുമതലയല്ല : ഫയർ ഓഡിറ്റ് നടത്തുകയും നടപടികൾക്ക് ഫയർഫോഴ്സ് നിർദേശം നൽകുകയും ചെയ്‌തിട്ടുണ്ട്. മുഴുവൻ അഗ്നിശമന സേനയും അഗാധമായ ദുഃഖത്തിലാണ്. എന്നാൽ എൻഫോഴ്‌സ്‌മെന്‍റ് ഫയർഫോഴ്‌സിൻ്റെ ചുമതലയല്ല. സ്ഥലത്ത് ബ്‌ളീച്ചിംഗ് പൗഡറും ആൽക്കഹോളും ഒരുമിച്ചായിരുന്നോ സൂക്ഷിച്ചിരുന്നതെന്ന് വ്യക്തമല്ലെന്നും ബി സന്ധ്യ ഐ പി എസ് പറഞ്ഞു. കെട്ടിടത്തിൻ്റെ ഒരു ഭാഗത്ത് നിന്നും തീയും പുകയും ഉയരുന്നത് കണ്ട ഫയർമാൻ രഞ്‌ജിത്ത് കതക് തളളി തുറന്ന് ആ ഭാഗത്തേക്ക് പോയപ്പോഴായിരുന്നു ദുർബലമായ ഹോളോബ്രിക്‌സ്‌ ദേഹത്തേക്ക് മറിഞ്ഞു വീണ് അപകടമുണ്ടായത്.
ഇന്ന് പുലര്‍ച്ചെ ഒന്നരയോടെയാണ് കിൻഫ്ര പാർക്കിലെ മെഡിക്കൽ കോർപറേഷൻ സർവവീസസ് സംഭരണ കേന്ദ്രത്തിൽ തീപിടിത്തമുണ്ടായത്. ഗോഡൗണിൽ സൂക്ഷിച്ചിരുന്ന ബ്ലീച്ചിങ് പൗഡറിനാണ് തീപിടിച്ചതെന്നാണ് പ്രാഥമിക നിഗമനം. ഏകദേശം 1.22 കോടിയുടെ നഷ്‌ടം സംഭവിച്ചിട്ടുണ്ടെന്ന് കെഎംഎസ്‌സിഎൽ അറിയിച്ചു. മരുന്നുകൾ സൂക്ഷിച്ചിരുന്ന കെട്ടിടത്തിലേക്ക് തീ പടരാത്തതിനാൽ വലിയ അപകടം ഒഴിവായി. തീ പടരുന്ന സമയത്ത് സെക്യൂരിറ്റി ജീവനക്കാരൻ മാത്രമാണ് സ്ഥലത്തുണ്ടായിരുന്നത്.