'മയക്കുമരുന്ന് കേസിലെ പ്രതികളെ കരുതല്‍ തടങ്കലില്‍ വയ്‌ക്കും'; മന്ത്രി എം.ബി രാജേഷ്

ലഹരി വസ്‌തുക്കളുടെ ഉത്പാദനം, വിപണനം, കൈമാറ്റം എന്നിവ തടയുന്നതിനായി സംസ്ഥാനത്ത് മയക്കുമരുന്ന് കേസുകളിലെ പ്രതികളെ കരുതൽ തടങ്കലിൽ വയ്ക്കുമെന്ന് നിയമസഭയെ അറിയിച്ച് എക്സൈസ് മന്ത്രി എം.ബി.രാജേഷ്

തിരുവനന്തപുരം:മയക്കുമരുന്ന് കേസുകളിലെ പ്രതികളെ കരുതൽ തടങ്കലിൽ വയ്ക്കുമെന്നറിയിച്ച് എക്സൈസ് മന്ത്രി എം.ബി.രാജേഷ്. എൻഡിപിഎസ് ആക്‌ടിലെ വകുപ്പുകൾ അടിസ്ഥാനമാക്കിയാണ് പ്രതികളെ ഇത്തരത്തിൽ കരുതൽ തടങ്കലിൽ പാർപ്പിക്കുക. 63 പ്രതികളെ ഇത്തരത്തിൽ കരുതൽ തടങ്കലിൽ സൂക്ഷിക്കുന്നതിനുള്ള നടപടികൾ ആരംഭിച്ചതായും മന്ത്രി നിയമസഭയിൽ ചോദ്യോത്തര വേളയിൽ വ്യക്തമാക്കി.

ലഹരി വസ്‌തുക്കളുടെ ഉത്പാദനം, വിപണനം, കൈമാറ്റം എന്നിവ തടയുക എന്നതാണ് കരുതൽ തടങ്കലിലൂടെ ലക്ഷ്യമിടുന്നത്. ഇതിലുള്ള നടപടികൾ സർക്കാർ ആരംഭിച്ചതായും മന്ത്രി വ്യക്തമാക്കി. സംസ്ഥാനത്ത് മയക്കു മരുന്നുകളുടെ വിതരണം എക്സൈസ് വകുപ്പ് മറ്റു വകുപ്പുകളുമായി ചേർന്ന് സംയുക്ത പരിശോധനകൾ നടത്തുന്നുണ്ട്. വിവിധ വകുപ്പുകളെ ഏകോപിപ്പിച്ച് വാട്‌സ്‌ആപ്പ് ഗ്രൂപ്പുകളുണ്ടാക്കി രഹസ്യ വിവരങ്ങൾ വേഗത്തിൽ കൈമാറുകയാണ്. അതിലൂടെ പരിശോധനകൾ കൂടുതൽ കാര്യക്ഷമമാക്കാം എന്നാണ് കണക്കാക്കുന്നതെന്നും മന്ത്രി പറഞ്ഞു.

എക്സൈസ് വകുപ്പിനെ ആധുനികവൽക്കരിക്കുന്നതിനുള്ള നടപടികളും ആരംഭിച്ചിട്ടുണ്ട്. കാലപ്പഴക്കം ചെന്ന വാഹനങ്ങൾ ഒഴിവാക്കി 33 വാഹനങ്ങൾ പുതുതായി അനുവദിച്ചു. പുതിയ റെയിഞ്ച് ഓഫീസുകൾ ആരംഭിക്കാനുള്ള നടപടികൾ നടക്കുകയാണെന്നും മന്ത്രി എം.ബി.രാജേഷ് അറിയിച്ചു. സംസ്ഥാനത്താകെ 41 എക്സൈസ് ചെക്ക് പോസ്‌റ്റുകളാണ് പ്രവർത്തിക്കുന്നത്. എന്നാൽ പുതുതായി പാലങ്ങളും റോഡുകളും നിർമിക്കപ്പെട്ടതിനാൽ മറ്റു വഴികളിലൂടെ ലഹരിക്കടത്ത് നടക്കുന്നുണ്ട്. അത് കണ്ടെത്തുന്നതിന് പരിശോധനകൾ ശക്തമാക്കുമെന്നും മന്ത്രി വ്യക്തമാക്കി.

സ്കൂൾ പരിസരത്ത് ലഹരി വില്‍പന നടക്കുന്നത് എക്സൈസ് ശ്രദ്ധയിൽപ്പെട്ടിട്ടുണ്ട്. സ്കൂൾ പ്രവർത്തി സമയം ആരംഭിക്കുന്നതിന് മുമ്പും പ്രവർത്തി സമയത്തിനു ശേഷവും അപ്രതീക്ഷിത പരിശോധനകൾ നടത്തുന്നുണ്ട്. ഇത്തരം പരിശോധനകളിലൂടെ 523 കേസുകൾ രജിസ്‌റ്റർ ചെയ്തതായും മന്ത്രി നിയമസഭയെ അറിയിച്ചു.