തിരുവനന്തപുരം: സംസ്ഥാന ആഭ്യന്തര വകുപ്പില്‍ മുഖ്യമന്ത്രിക്ക് യാതൊരു നിയന്ത്രണവുമില്ലെന്നും കേരളത്തില്‍ ഗുണ്ടകളുടെ അഴിഞ്ഞാട്ടമാണെന്നും പ്രതിപക്ഷ നേതാവ്‌ വി.ഡി.സതീശന്‍. തലശ്ശേരി പുന്നോലില്‍ സിപിഎം പ്രവര്‍ത്തകന്‍ ഹരിദാസ്‌ കൊല്ലപ്പെട്ട സംഭവം അപലപനീയമാണ്.
കൊലപാതകത്തിന് പിന്നില്‍ ബിജെപി-ആര്‍എസ്‌എസ്‌ പ്രവര്‍ത്തകരാണെന്നാണ് സിപിഎം ആരോപിക്കുന്നത്. ആര്‍എസ്‌എസ്‌-സിപിഎം പോര്‍വിളി കണ്ണൂരിനെ നേരത്തെയും ചോരക്കളമാക്കിയിട്ടുണ്ട്. ഈ ചോരക്കളി പരിഷ്‌കൃത സമൂഹത്തിന് യോജിച്ചതല്ലെന്നും പ്രതിപക്ഷ നേതാവ്‌ പറഞ്ഞു.
സംസ്ഥാനത്തെ ക്രമസമാധനനില പൂര്‍ണമായും തകര്‍ന്നിരിക്കുകയാണ്. കൊല്ലും കൊലയും അക്രമസംഭവങ്ങളും സര്‍വസാധാരണമായി. കൊലവിളി മുഴക്കി ഗുണ്ടാസംഘങ്ങള്‍ പൊലീസിനെ പോലും വെല്ലുവിളിക്കുകയാണെന്നും അദ്ദേഹം ആരോപിച്ചു. ജനങ്ങളുടെ ജീവന് സുരക്ഷിതത്വമില്ല. പൊലീസും ആഭ്യന്തര വകുപ്പും നിഷ്‌ക്രിയമാണെന്നും വ.ഡി.സതീശന്‍ പറഞ്ഞു.