കൊവിഡും മഴയും; ഓണക്കാലത്ത് പ്രതീക്ഷ നഷ്‌ടപ്പെട്ട് വെള്ളായണി

മഴ ചതിച്ചതോടെ വിളവ് ഗണ്യമായി കുറഞ്ഞതും കൊവിഡിൻ്റെ പശ്ചാത്തലത്തിൽ വിൽപന ഇടിഞ്ഞതുമാണ് കർഷകരുടെ പ്രതീക്ഷകൾ തകർത്തത്.

തിരുവനന്തപുരം:ഓണക്കാലത്ത് പ്രതീക്ഷ നഷ്ടപ്പെട്ട് തിരുവനന്തപുരത്തെ പച്ചക്കറി ഗ്രാമമായ വെള്ളായണി. മഴ ചതിച്ചതോടെ വിളവ് ഗണ്യമായി കുറഞ്ഞതും കൊവിഡിൻ്റെ പശ്ചാത്തലത്തിൽ വിൽപന ഇടിഞ്ഞതുമാണ് കർഷകരുടെ
പ്രതീക്ഷകൾ തകർത്തത്. വിപണിയിൽ ഇതര സംസ്ഥാന പച്ചക്കറികൾ എത്തുന്നതും ഇത്തവണ വലിയ തിരിച്ചടിയാവുമെന്ന് ഇവർ കണക്കുകൂട്ടുന്നു. ഓണത്തിന് തയ്യാറെടുക്കുന്ന വെള്ളായണിയിലെ പച്ചക്കറിപ്പാടങ്ങൾക്ക് പഴയ പകിട്ടില്ല. അപ്രതീക്ഷിതമായി പെയ്‌ത മഴയിൽ വെള്ളം കയറി വിളവു നശിച്ചതാണ് ആദ്യത്തെ അടി. 25 വർഷമായി പാപ്പാഞ്ചാണി ഏലായിൽ കൃഷിയിറക്കുന്ന അജയന് കനത്ത നഷ്ടമാണ് ഇതുമൂലമുണ്ടായത്.

അജയനെപ്പോലെ 150 ഓളം പേരാണ് പാപ്പാഞ്ചാണി ഏലായിലെ മുഴുവൻ സമയ കർഷകർ. മാർച്ച് അവസാനം ലോക്ക് ഡൗൺ പ്രഖ്യാപിച്ചതോടെ ഇവരുടെ പ്രതിസന്ധി രൂക്ഷമായി. മൊത്തവ്യാപാരികളുടെയും വൻകിട ചില്ലറവിൽപനക്കാരുടെയും കച്ചവടം പ്രതിസന്ധിയിലായതാണ് കർഷകരെയും കഷ്ടത്തിലാക്കിയത്. പ്രതിസന്ധിയുണ്ടെങ്കിലും കർഷകർ ജോലി തുടരുകയാണ്. പടവലം, പാവൽ, പയർ, വെള്ളരി, വെണ്ട, ഏത്തക്കായ, ചീര, നെല്ല് തുടങ്ങിയവയെല്ലാം ഓണവിളവെടുപ്പിന് തയ്യാറാകുന്നു.