പോസ്റ്റൽ ബാലറ്റുകളുടെ വിശദാംശങ്ങൾ പുറത്തുവിടണമെന്ന് ചെന്നിത്തല

പോസ്റ്റൽ ബാലറ്റുകളുടെ വിശദാംശങ്ങൾ പുറത്തുവിടണമെന്നാവശ്യപ്പെട്ട് രമേശ് ചെന്നിത്തല വീണ്ടും മുഖ്യ തെരഞ്ഞെടുപ്പ് ഓഫിസർ ടിക്കാറാം മീണയ്ക്ക് കത്തുനല്‍കി.

തിരുവനന്തപുരം:പോസ്റ്റൽ ബാലറ്റുകളുടെ വിശദാംശങ്ങൾ പുറത്തുവിടണമെന്ന് പ്രതിപക്ഷനേതാവ് രമേശ് ചെന്നിത്തല. ഇക്കാര്യമാവശ്യപ്പെട്ട് വീണ്ടും മുഖ്യ തെരഞ്ഞെടുപ്പ് ഓഫിസർ ടീക്കാറാം മീണയ്ക്ക് കത്തുനൽകി.

പോസ്റ്റൽ ബാലറ്റുകളുടെ വിതരണത്തിലും ശേഖരണത്തിലും സൂക്ഷിക്കുന്ന കാര്യത്തിലും വീഴ്‌ച സംഭവിച്ചുവെന്ന ആരോപണമുയർന്ന പശ്ചാത്തലത്തിലാണ് പ്രതിപക്ഷ നേതാവ് വിശദാംശങ്ങൾ ആവശ്യപ്പെട്ടത്.

ആകെ വിതരണം ചെയ്‌ത പോസ്റ്റൽ ബാലറ്റുകൾ, വോട്ട് രേഖപ്പെടുത്തിയവ, എൺപത് വയസിന് മുകളിൽ പ്രായമുള്ള മുതിർന്ന പൗരന്മാർക്ക് വിതരണം ചെയ്‌തവ, ഇവയിൽ വോട്ട് രേഖപ്പെടുത്തിയവ, എന്നീ കണക്കുകൾ പുറത്തുവിടണമെന്നാണ് ആവശ്യം.

പോസ്റ്റൽ ബാലറ്റിലെ ക്രമക്കേടുകൾ സംബന്ധിച്ച് ചെന്നിത്തല ടിക്കാറാം മീണയ്ക്ക് കഴിഞ്ഞ ദിവസവും കത്ത് നൽകിയിരുന്നു.