തിരുവനന്തപുരം: അരുവിക്കരയില്‍ വീട് കുത്തിത്തുറന്ന് മോഷണം. വീട്ടുടമസ്ഥര്‍ ജോലിക്കും കുട്ടി സ്‌കൂളിലും പോയ സമയത്തായിരുന്നു സംഭവം. ജയ്ഹിന്ദ് ടിവി ടെക്‌നിക്കല്‍ വിഭാഗം ജീവനക്കാരൻ ആര്‍ മുരുകന്‍റെയും ഭക്ഷ്യസുരക്ഷ വിഭാഗത്തിലെ റിസര്‍ച്ച് ഓഫീസര്‍ രാജി പിആറിന്‍റെയും വീട്ടില്‍ നിന്ന് എട്ടുലക്ഷത്തി അറുപത്തി അയ്യായിരം രൂപയും 32 പവനുമാണ് മോഷണം പോയത്.
വസ്‌തു വിറ്റ വകയില്‍ സൂക്ഷിച്ചിരുന്ന തുകയാണ് കവര്‍ന്നതെന്ന് വീട്ടുടമസ്ഥർ പറഞ്ഞു. വീടിന്‍റെ മുന്‍വശത്തുള്ള പ്രധാന വാതില്‍ കുത്തിത്തുറന്ന് അകത്ത് കടന്നതിന് ശേഷം ബെഡ്‌റൂമിലെ അലമാരയില്‍ സൂക്ഷിച്ചിരുന്ന സ്വര്‍ണവും പണവും കവരുകയായിരുന്നു. അയല്‍വാസിയായ സ്‌ത്രീ, വീടിന്‍റെ മതില്‍ ചാടി രണ്ട് പേര്‍ പോകുന്നത് കണ്ട് ചെന്ന് പരിശോധിച്ചപ്പോഴായിരുന്നു മോഷണം നടന്നതായി തിരിച്ചറിഞ്ഞത്.