തിരുവനന്തപുരം: കൈകൾ വൃത്തിയാക്കുന്നതിനോടൊപ്പം കൗതുകവും സമ്മാനിച്ച് കാട്ടാക്കട പൊലീസ് സ്റ്റേഷനിലെ ഓട്ടോമാറ്റിക് സാനിറ്റൈസിങ് സംവിധാനം. പൊലീസ് സ്റ്റേഷനിലെത്തുന്നവര്‍ക്ക് കൈ ശുചീകരിക്കാൻ പിഎംഎസ് ഡെന്‍റൽ കോളജ് സീനിയർ ഡോക്‌ടര്‍ സി.ആദർശാണ് മെഷീന്‍ രൂപകൽപന ചെയ്‌തത്. ആര്യനാട് പ്രസ് ക്ലബ്ബിന്‍റെ നേതൃത്വത്തിലായിരുന്നു ഓട്ടോമാറ്റിക് സാനിറ്റൈസിങ് സംവിധാനം ഇൻസ്‌പെക്‌ടർ ഡി.ബിജുകുമാറിന് കൈമാറിയത്.
ഓട്ടോമാറ്റിക് സംവിധാനം ഒരുക്കുന്നതിലൂടെ സാനിറ്റൈസറിലുള്ള സ്‌പര്‍ശനം തീര്‍ത്തും ഒഴിവാക്കാന്‍ സാധിക്കുമെന്നതാണ് പ്രധാന പ്രത്യേകത. ഒരു കൈ സാനിറ്റൈസർ കുപ്പിക്ക് കീഴിലും മറ്റേ കൈ പ്രത്യേകമായി ഘടിപ്പിച്ചിട്ടുള്ള സെന്‍സറിന് മുകളിലുമായി വെച്ചാല്‍ മതി, സാനിറ്റൈസർ കൈകളിലേക്കെത്തും. സെൻസർ, റെസിസ്റ്റർ, പവർ ബാങ്ക്, ചാർജ് ചെയ്യാൻ രണ്ട് മൊബൈൽ ചാർജ് പോയിന്‍റുകൾ എന്നിവ ഘടിപ്പിച്ചാണ് ഈ സംവിധാനം ഒരുക്കിയിട്ടുള്ളത്. സാനിറ്റൈസര്‍ മിശ്രിതവും ചാർജും തീര്‍ന്നാല്‍ വീണ്ടും നിറച്ചാല്‍ പ്രവര്‍ത്തനസജ്ജമാകുന്ന രീതിയിലാണ് രൂപകല്‍പന. ആര്യനാട് പൊലീസ് സ്റ്റേഷനിലും സംവിധാനം ഒരുക്കാനുള്ള ശ്രമത്തിലാണ് അധികൃതര്‍.
