'ആത്മഹത്യയല്ലാതെ വഴിയില്ല'; കൂടുതൽ ഇളവുകളാവശ്യപ്പെട്ട് സമരം ശക്തമാക്കി സംരംഭ ഉടമകൾ

ഓഡിറ്റോറിയം ഉടമകളും ബാർബർ ആൻഡ് ബ്യൂട്ടീഷൻസ് രംഗത്ത് പ്രവർത്തിക്കുന്നവരമാണ് സെക്രട്ടേറിയറ്റിന് മുന്നിൽ സമരം ശക്തമാക്കിയത്.

തിരുവനന്തപുരം : കൊവിഡ് നിയന്ത്രണങ്ങളിൽ കൂടുതൽ ഇളവുകൾ ആവശ്യപ്പെട്ട് വിവിധ തൊഴിൽ മേഖലകളിൽ പ്രവർത്തിക്കുന്നവർ സെക്രട്ടറിയേറ്റിന് മുന്നിൽ സമരം ശക്തമാക്കി.

വിവാഹങ്ങൾക്ക് 20 പേരിൽ കൂടുതൽ ആളുകളെ അനുവദിക്കാത്ത സർക്കാർ നിലപാടിനെതിരെ, ഓഡിറ്റോറിയം ഉടമകളും അതിജീവന സമരവുമായി ബാർബർ ആൻഡ് ബ്യൂട്ടീഷൻ സംഘടനയുമാണ് പ്രതിഷേധം കടുപ്പിച്ചത്.

ഇളവുകൾ നൽകാന്‍ സര്‍ക്കാര്‍ തയ്യാറാകണമെന്ന് ഓഡിറ്റോറിയം ഉടമകളുടെ സമരം ഉദ്ഘാടനം ചെയ്ത് രമേശ് ചെന്നിത്തല എം.എൽ.എ ആവശ്യപ്പെട്ടു.

കഴുത്തിൽ കുരുക്കിട്ട് പ്രതിഷേധം

കഴുത്തിൽ കുരുക്കിട്ട് പ്രതീകാത്മക ആത്മഹത്യ അവതരിപ്പിച്ചാണ് ഓഡിറ്റോറിയം ഉടമകൾ സമരം ചെയ്തത്. വിവാഹത്തിന് 20 പേരെ മാത്രം അനുവദിക്കുന്നതിനാൽ ഓഡിറ്റോറിയങ്ങൾ മാസങ്ങളായി അടഞ്ഞുകിടക്കുകയാണ്.

വരുമാനം മുടങ്ങിയതിനൊപ്പം വായ്‌പാ അടവുകളും മുടങ്ങി. അതേസമയം വൻകിട ഹോട്ടലുകളിലും റിസോർട്ടുകളിലും സാമൂഹിക അകലം പാലിക്കാതെ വിവാഹങ്ങൾ നടക്കുന്നതായും ഇവർ ചൂണ്ടിക്കാട്ടുന്നു.

കുടുംബങ്ങൾ പട്ടിണിയിൽ

വരുമാനമില്ലാതെ വാടക കൊടുക്കേണ്ട സ്ഥിതിയിൽ ജീവിതം മുടങ്ങിയത് ചൂണ്ടിക്കാട്ടിയാണ് ബാർബർ ആൻഡ് ബ്യൂട്ടീഷ്യന്‍സ് രംഗത്തെത്തിയത്. കുടുംബങ്ങൾ പട്ടിണിയിലാണ്. സർക്കാർ ഉടൻ ഇളവുകൾ അനുവദിച്ചില്ലെങ്കിൽ തങ്ങളുടെ മേഖല പൂർണ തകർച്ചയിലാകുമെന്ന് ഇവർ വ്യക്തമാക്കുന്നു.

കൊവിഡ് നിയന്ത്രണങ്ങൾ ശാസ്ത്രീയമാക്കണം

കൊവിഡ് മാനദണ്ഡങ്ങൾ പാലിച്ചുകൊണ്ടുതന്നെ വിവിധ മേഖലകളിൽ ഇളവ് അനുവദിക്കാൻ സർക്കാർ തയ്യാറാകണമെന്ന് രമേശ് ചെന്നിത്തല ആവശ്യപ്പെട്ടു.

വിവിധ മേഖലകളിലെ സംരംഭകരും തൊഴിലാളികളും വരുമാനം ഇല്ലാതെ വായ്പ മുടങ്ങി ആത്മഹത്യ ചെയ്യുന്ന സാഹചര്യം വലിയ ആശങ്കയാണ് ഉയർത്തുന്നത്. കൊവിഡ് നിയന്ത്രണം ശാസ്ത്രീയമാക്കി സംരംഭങ്ങൾ പ്രവർത്തിക്കാൻ അനുവദിക്കണമെന്ന ആവശ്യം ശക്തമാണ്.