ഭഗവതിയെ കാപ്പുകെട്ടി കുടിയിരുത്തി; ആറ്റുകാൽ പൊങ്കാല ഫെബ്രുവരി 17ന്

കഴിഞ്ഞ വർഷത്തേതു പോലെ ഇക്കുറിയും ഭക്തർ വീടുകളിൽ തന്നെ പൊങ്കാല അർപ്പിക്കും.

തിരുവനന്തപുരം:പൊങ്കാല മഹോത്സവത്തിന് മുന്നോടിയായുള്ള ആറ്റുകാൽ ഉത്സവത്തിന് തുടക്കമായി. ഇന്ന് (09.02.22) രാവിലെ 10.50ന് ഭഗവതിയെ കാപ്പുകെട്ടി പാടി കുടിയിരുത്തിയതോടെയാണ് ഉത്സവങ്ങൾക്ക് തുടക്കമായത്. ഉത്സവത്തിലെ പ്രധാന ചടങ്ങുകളിലൊന്നായ തോറ്റംപാട്ടിന്‍റെ അകമ്പടിയോടെയാണ് ദേവിയെ കാപ്പു കെട്ടി കുടിയിരുത്തിയത്.

കൊവിഡ് നിയന്ത്രണങ്ങൾ വകവയ്ക്കാതെ ഉത്സവാരംഭ ചടങ്ങുകൾക്ക് ഭക്തർ ഒഴുകിയെത്തിയതോടെ ഇവരെ നിയന്ത്രിക്കാൻ പൊലീസും, സെക്യൂരിറ്റി ജീവനക്കാരും നന്നേ പാടുപെട്ടു. ഫെബ്രുവരി 17നാണ് ആറ്റുകാൽ പൊങ്കാല. ക്ഷേത്രാങ്കണത്തിൽ ഭക്തജനത്തിരക്കുണ്ടായാലും കൊവിഡ് മാനദണ്ഡങ്ങൾ പാലിച്ച് ഭക്തർക്ക് ദർശനം നടത്താനുള്ള എല്ലാ സൗകര്യങ്ങളും ഒരുക്കിയിട്ടുണ്ടെന്ന് ട്രസ്റ്റ് ജോയിന്‍റ് ജനറൽ കൺവീനർ സി.അനിൽകുമാർ പറഞ്ഞു.

പൊങ്കാലയോടനുബന്ധിച്ച് ക്ഷേത്രപരിസരം ദീപാലംകൃതമായി. ക്ഷേത്രപരിസരത്ത് വഴിയോര കച്ചവടക്കാരും തിങ്ങിനിറഞ്ഞ് കഴിഞ്ഞു. 200 പേർക്ക് ക്ഷേത്രപരിസരത്ത് പൊങ്കാല അർപ്പിക്കാൻ അനുമതി നൽകിയെങ്കിലും ഇത് പ്രായോഗികമല്ലാത്തതിനാൽ ക്ഷേത്ര ട്രസ്റ്റ് അധികൃതർ സർക്കാർ നിർദ്ദേശം വേണ്ടെന്നുവെക്കുകയായിരുന്നു.

കഴിഞ്ഞ വർഷത്തേതുപോലെ ഇക്കുറിയും ഭക്തർ വീടുകളിൽ തന്നെ പൊങ്കാല അർപ്പിക്കും. 17ന് രാവിലെ 10:50 നാണ് അടുപ്പ് വെട്ട്. 1:20 ന് നിവേദ്യം. ബുധനാഴ്‌ച രാത്രി വിവിധ സ്ഥലങ്ങളിൽ നിന്ന് ക്ഷേത്രസന്നിധിയിലേക്ക് വിളക്ക് കെട്ടുകൾ എത്തിച്ചു തുടങ്ങും.