തിരുവനന്തപുരം:ധനുവച്ചപുരത്ത് സി.പി.എം സ്‌മൃതിമണ്ഡപത്തിന് നേരെ ആക്രമണം. മുതിർന്ന സി.പി.എം പ്രവർത്തകൻ ആയിരുന്ന എ.നവകുമാരന്‍റെ സ്‌മൃതിമണ്ഡപമാണ് അടിച്ച് തകർത്തനിലയിൽ കണ്ടത്.
അദ്ദേഹത്തിന്‍റെ ചരമവാർഷിക ദിനമായ ഇന്ന് (വെള്ളി) പുലർച്ചെയായിരുന്നു സംഭവം. വാർഷികത്തോടനുബന്ധിച്ച് സ്ഥാപിച്ചിരുന്ന കൊടിതോരണങ്ങളും നശിപ്പിക്കപ്പെട്ട നിലയിലാണ്.
ഇന്നലെ ധനുവച്ചപുരം വി.ടി.എം എൻഎസ്എസ് കോളജ് ഉൾപ്പെടെയുള്ള സ്ഥാപനങ്ങൾക്ക് നേരെയും ആക്രമണം നടന്നിരുന്നു. സംഭവവുമായി ബന്ധപ്പെട്ട് മൂന്നു വിദ്യാർത്ഥികളെ പൊലീസ് അറസ്റ്റ് ചെയ്തു. ഐഎച്ച്ആർഡി കോളജിലെ വിദ്യാർഥികളും എസ്.എഫ്.ഐ പ്രവർത്തകരുമായവരാണ് ഇന്നലെ അറസ്റ്റിലായത്. തൊട്ടുപിന്നാലെയാണ് ഇന്ന് സി.പി.എം സ്‌മൃതിമണ്ഡപം ആക്രമിക്കപ്പെട്ടിരിക്കുന്നത്.
പാറശാല പൊലീസ് ആക്രമണ സ്ഥലത്ത് ക്യാമ്പ് ചെയ്യുകയാണ്. സിസിടിവി ദൃശ്യങ്ങൾ ഉൾപ്പെടെ പരിശോധിച്ച് വരുന്നതായും കേസെടുത്ത് അന്വേഷണം ആരംഭിച്ചതായും പൊലീസ് പറഞ്ഞു.
