പി കെ ഫിറോസിന്‍റെ ആരോപണങ്ങൾ അടിസ്ഥാനരഹിതമെന്ന് എ കെ ബാലൻ

സുതാര്യമല്ലാത്ത ഒന്നും തന്‍റെ വകുപ്പിൽ നടന്നിട്ടില്ല. മതിയായ യോഗ്യതയുടെ അടിസ്ഥാനത്തിലാണ് മണി ഭൂഷണിനെ നിയമിച്ചതെന്നും മന്ത്രി എ കെ ബാലൻ.

യൂത്ത് ലീഗ് ജനറൽ സെക്രട്ടറി പികെ ഫിറോസിന്‍റെ നിയമന ആരോപണങ്ങൾ തള്ളി മന്ത്രി എ കെ ബാലൻ. അഡീഷണൽ പ്രൈവറ്റ് സെക്രട്ടറിക്ക് അടക്കം മതിയായ വിദ്യാഭ്യാസ യോഗ്യത ഇല്ലാത്തവർക്ക് കിർത്താഡ്സ് സ്ഥിരനിയമനം നൽകി എന്ന ഫിറോസിന്‍റെ ആരോപണം അടിസ്ഥാനരഹിതമെന്നും യുഡിഎഫ് സർക്കാരിന്‍റെ കാലത്താണ് മണിഭൂഷണിനെ നിയമിച്ചതെന്നും മന്ത്രി പറഞ്ഞു . ഇന്ന് രാവിലെയാണ് എ കെ ബാലനെതിരെ നിയമന ആരോപണവുമായി പികെ ഫിറോസ് രംഗത്തെത്തിയത്.

സുതാര്യമല്ലാത്ത ഒന്നും തന്‍റെ വകുപ്പിൽ നടന്നിട്ടില്ല. മതിയായ യോഗ്യതയുടെ അടിസ്ഥാനത്തിലാണ് മണി ഭൂഷണിനെ നിയമിച്ചതെന്നും മന്ത്രി വ്യക്തമാക്കി. എ കെ ബാലന്‍റെ അഡീഷണൽ പ്രൈവറ്റ് സെക്രട്ടറി മണി ഭൂഷണിന് കിർത്താഡ്സ് നിയമങ്ങൾ മറികടന്നാണ് നിയമനം നൽകിയതെന്നായിരുന്നു പികെ ഫിറോസ് കോഴിക്കോട് നടത്തിയ വാർത്താസമ്മേളനത്തിൽ ആരോപിച്ചത്. അതീവ പരിഗണന അർഹിക്കുന്നവർക്ക് നിയമനം നൽകുന്ന സർവ്വീസ് റൂളിലെ ചട്ടപ്രകാരമാണ് മണി ഭൂഷണിന്‍റെ പ്രൊബേഷൻ ഡിക്ലയർ ചെയ്തതെന്നും പികെ ഫിറോസ് ആരോപിച്ചിരുന്നു.

മന്ത്രി കെ ടി ജലീലിനെതിരെ ഉയർത്തിയ ബന്ധുനിയമന ആരോപണങ്ങൾക്ക് പിന്നാലെയാണ് പികെ ഫിറോസ് മന്ത്രി എ കെ ബാലനെതിരെ നിയമന വിവാദവുമായി രംഗത്തെത്തിയിരിക്കുന്നത്