പത്തനംതിട്ട: ക്ഷേത്രത്തിൽ വിവാഹ ചടങ്ങിലെത്തിയ വയോധികയുടെ സ്വർണമാല മോഷ്‌ടിച്ച രണ്ട് നാടോടി സ്ത്രീകളെ പൊലീസ് അറസ്‌റ്റ് ചെയ്തു. നാല് പവൻ സ്വർണമാലയാണ് മോഷ്‌ടിച്ചത്. തമിഴ്‌നാട് വേളൂർ സ്വദേശിനി മാലിനി (30), കൃഷ ഗിരി സ്വദേശിനി ജിബ (50) എന്നിവരാണ് കൂടൽ പൊലീസിന്‍റെ പിടിയിലായത്.
കലഞ്ഞൂർ മഹാദേവർ ക്ഷേത്രത്തിൽ ഞായറാഴ്‌ച ഉച്ചയ്ക്ക് ഒന്നരയ്ക്കാണ് സംഭവം. അയൽവാസിയുടെ മകളുടെ വിവാഹചടങ്ങിൽ പങ്കെടുക്കാനെത്തിയ ആരുവാപ്പുലം അതിരുങ്കൽ സ്വദേശിനി സുമതിയുടെ (70) മാലയാണ് അപഹരിക്കപ്പെട്ടത്. മാല നഷ്‌ടമായത് തിരിച്ചറിഞ്ഞ സുമതി ബഹളം കൂട്ടിയപ്പോൾ, സംശയകരമായ നിലയിൽ കണ്ട തമിഴ്‌നാട് സ്വദേശിനികളെ നാട്ടുകാർ തടഞ്ഞുവച്ച് ചോദ്യം ചെയ്യുകയായിരുന്നു.