പത്തനംതിട്ട: കൂട്ടുകാർ ഇങ്ങനെയാണ്... എന്തിനും ഏതിനും ഒപ്പമുണ്ടാകും. സ്വന്തം രക്തം നല്‍കിയും കൂടെ നില്‍ക്കും. അങ്ങനെയൊരു കൂട്ടുകാരന്‍റെ കഥയാണിത്. കഥ മാത്രമല്ല, കഥയ്ക്ക് പിന്നില്‍ ഒരു കടയുമുണ്ട്. പത്തനംതിട്ട ജില്ലയിലെ അടൂർ നഗരത്തില്‍ വീടിനോട് ചേർന്ന് വിനീത് എന്ന ചെറുപ്പക്കാരൻ ഒരു ജ്യൂസ് കട തുടങ്ങിയപ്പോൾ അതിന് ഇട്ട പേര് 'കൂട്ടുകാരന്‍റെ കട' എന്നാണ്. വെറുതെ ഒരു പേരല്ല അത്.
അടൂരിലെ വിനീതിന്റെ 'കൂട്ടുകാരന്‍റെ കട' ശ്രദ്ധേയമാകുന്നു
കടയിലെ എല്ലാ ടേബിളുകളിലും മെനു കാർഡിനൊപ്പം ഒരു ബുക്ക് കൂടിയുണ്ടാകും. കടയിൽ എത്തുന്നവരോട് വിനീത് രക്തദാനത്തിന്റെ പ്രാധാന്യം ചുരുക്കി പറയും. രക്തദാനത്തിന് തയ്യാറാണെങ്കിൽ ബ്ലഡ്‌ ഗ്രൂപ്പും ഫോൺ നമ്പറും ഉൾപ്പെടെ വിവരങ്ങൾ ആ ബുക്കില്‍ എഴുതാൻ പറയും. രക്തദാനത്തിന്റെ പ്രാധാന്യം ഉൾകൊള്ളുന്ന സന്ദേശങ്ങളാണ് കടയുടെ എല്ലാ ഭാഗങ്ങളിലും നിറയുന്നത്.