ഗീവർഗീസ് മാർ തിമോത്തിയോസ് കാലം ചെയ്തു

തിരുവല്ല അതിരൂപത മുൻ അധ്യക്ഷനായിരുന്ന ഗീവർഗീസ് മാർ തിമോത്തിയോസ് 2003 ല്‍ സ്ഥാനമൊഴിഞ്ഞ ശേഷം സഭാ ഐക്യ പ്രസ്ഥാനങ്ങൾക്കും സാമൂഹിക സംഘടനകൾക്കും വേണ്ടി പ്രവർത്തിച്ചുവരികയായിരുന്നു

പത്തനംതിട്ട: ഇന്ന് പുലർച്ചെ 3.15നായിരുന്നു ഗീവർഗീസ് മാർ തിമോത്തിയോസ് കാലം ചെയ്തത്. 91 വയസായിരുന്നു. കബറടക്ക ശുശ്രൂഷ വ്യാഴാഴ്ച തിരുവല്ല സെന്‍റ് ജോൺസ് മെത്രാപ്പൊലീത്തൻ കത്തീഡ്രലിൽ നടക്കും. ഉച്ചവരെ ഭൗതിക ശരീരം തിരുവല്ല പുഷ്പഗിരി മെഡിക്കൽ കോളജ് ആശുപത്രിയിലെ ചാപ്പലിലും തിരുവല്ല സെന്‍റ് ജോൺസ് മെത്രാപ്പൊലീത്തൻ കത്തീഡ്രൽ ദേവാലയത്തിലും പൊതുദർശനത്തിനു വച്ചു. തിരുവല്ല അതിരൂപതയുടെ വിവിധ പള്ളികളില്‍ വികാരിയായിരുന്നു ഗീവര്‍ഗീസ് മാര്‍ തിമോത്തിയോസ്. 1987 ല്‍ രൂപത അഡ്മിനിസ്ട്രേറ്ററും 1988 ഓഗസ്റ്റ് എട്ടിന് തിരുവല്ല രൂപതാധിപനുമായി. പുഷ്പഗിരി ആശുപത്രി മെഡിക്കൽ കോളജായി ഉയർത്തിയതിൽ വലിയ പങ്ക് വഹിച്ചു. പത്തനംതിട്ട, ഇടുക്കി, കോട്ടയം ജില്ലകളിൽ ഒട്ടേറെ വൃദ്ധസദനങ്ങളും ആതുരാലയങ്ങളും വിദ്യാലയങ്ങളും സ്ഥാപിക്കാൻ മുൻകയ്യെടുത്തു.