പത്തനംതിട്ട: പൗരത്വ ഭേദഗതി നിയമത്തിനെതിരെയും കേന്ദ്ര-സംസ്ഥാന സർക്കാരുകളുടെ ഭരണത്തിനെതിരെയും ജില്ലാ കോൺഗ്രസ് കമ്മിറ്റിയുടെ ആഭിമുഖ്യത്തിൽ ഒരു മാസം നീണ്ടുനിൽക്കുന്ന പദയാത്ര സംഘടിപ്പിക്കുമെന്ന് ജില്ലാ ഡിസിസി പ്രസിഡന്‍റ് ബാബു ജോർജ്. ഹിന്ദു-മുസ്ലിം ധ്രുവീകരണത്തിലൂടെ രാഷ്ട്രീയ അധികാരം നിലനിർത്താമെന്ന ബിജെപിയുടെ വ്യാമോഹമാണ് പൗരത്വ ഭേദഗതി നിയമത്തിന് പിന്നിലെന്നും ബാബു ജോർജ് ആരോപിച്ചു.
പത്തനംതിട്ട ജില്ലാ കോണ്‍ഗ്രസ് പദയാത്ര ജനുവരി 18ന് ആരംഭിക്കും കേരളവും ഇന്ത്യയും അകപ്പെട്ടിരിക്കുന്ന പ്രതിസന്ധികളുടെ ആഴം ജനങ്ങളെ ബോധ്യപ്പെടുത്തുകയെന്ന ലക്ഷ്യത്തോടെയാണ് കെപിസിസിയുടെ നിർദേശപ്രകാരം പദയാത്ര സംഘടിപ്പിക്കുന്നത്. ഈ മാസം 18ന് റാന്നി വെച്ചൂച്ചിറയിലെ ചാത്തൻതറയിൽ മുൻ മുഖ്യമന്ത്രി ഉമ്മൻ ചാണ്ടി പദയാത്ര ഉദ്ഘാടനം ചെയ്യും. എ.കെ.ആന്‍റണി ഉൾപ്പടെയുള്ള മുതിർന്ന നേതാക്കൾ പദയാത്രയുടെ വിവിധ ദിവസങ്ങളിലെ സമ്മേളനങ്ങളിൽ പങ്കെടുക്കും. ഫെബ്രുവരി 18ന് അടൂരിൽ പദയാത്ര സമാപിക്കും. സമാപന സമ്മേളനം പ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്യും.
