പത്തനംതിട്ട: കോളജ് കുട്ടികൾക്കൊപ്പം തകർപ്പൻ ഡാൻസുമായി പത്തനംതിട്ട ജില്ല കലക്‌ടർ ഡോ. ദിവ്യ എസ് അയ്യർ. എംജി സർവകലാശാല കലോത്സവത്തിന്‍റെ വേക്ക് അപ്പ് കോൾ 2022ന്‍റെ ഭാഗമായി വ്യാഴാഴ്‌ച (മാർച്ച് 31) നടന്ന പ്രോമോ ഡാൻസിലാണ് കോളജ് കുട്ടികൾക്കൊപ്പം കലക്‌ടറും ചുവടുകൾ വച്ചത്. പത്തനംതിട്ട ജില്ല സ്റ്റേഡിയത്തിലാണ് പ്രോമോ ഡാൻസ് നടന്നത്.
കോളജ് വിദ്യാർഥികൾക്കൊപ്പം തകർപ്പൻ ഡാൻസുമായി കലക്‌ടർ.. സംഗതി പൊളിച്ചെന്ന് സോഷ്യല്‍ മീഡിയ
കുട്ടികളെ കടത്തി വെട്ടുന്ന ചടുല നൃത്ത ചുവടുകളുമായാണ് കലക്‌ടർ താരമായത്. ഡാൻസിന്‍റെ ദൃശ്യങ്ങൾ സാമൂഹിക മാധ്യമങ്ങളില്‍ ഇപ്പോൾ വൻ തരംഗമാണ്. കലക്‌ടറെ അഭിനന്ദിച്ച് നിരവധി പേരാണ് സാമൂഹിക മാധ്യമങ്ങളില്‍ പ്രതികരണവുമായി എത്തുന്നത്. ഏപ്രില്‍ ഒന്നു മുതല്‍ അഞ്ച് വരെയാണ് കലോത്സവം. ഏഴ് വേദികളിലായി 61 മത്സരയിനങ്ങളാണുള്ളത്.