ദുരിതാശ്വാസ നിധിയിലേക്ക് സംഭാവന ചെയ്യൂ, കാരിക്കേച്ചറുകള്‍ സ്വന്തമാക്കൂ

സംഭാവന ചെയ്തതിന്‍റെ രസീതും ഫോട്ടോയും വാട്‌സ് ആപ് ചെയ്‌ത് നല്‍കിയാല്‍ അഞ്‌ജുരാഥ് കാരിക്കേച്ചറുകള്‍ വരച്ച് നല്‍കും

പത്തനംതിട്ട: കൊവിഡ് പ്രതിരോധ പ്രവര്‍ത്തനങ്ങള്‍ക്കായി ഒരുക്കിയിരിക്കുന്ന മുഖ്യമന്ത്രിയുടെ ദുരിതാശ്വസ നിധിയിലേക്ക് നിരവധി സുമനസുകളുടെ സഹായമാണ് സംസ്ഥാനത്തിന് പുറത്തുനിന്നടക്കം എത്തുന്നത്. ഇത്തരത്തില്‍ സംഭാവനകള്‍ നല്‍കുന്നവര്‍ക്ക് കിടിലന്‍ ഒരു സമ്മാനം നല്‍കുകയാണ് അഞ്‌ജുരാഥ് . എഞ്ചിനീയറിങ് വിദ്യാര്‍ഥിയായ അഞ്‌ജുരാഥ് കാരിക്കേച്ചറുകളാണ് സമ്മാനമായി നല്‍കുന്നത്.

സംഭാവന ചെയ്തതിന്‍റെ രസീതും ഫോട്ടോയും വാട്‌സ് ആപ് ചെയ്‌ത് നല്‍കിയാല്‍ അഞ്‌ജുരാഥ് കാരിക്കേച്ചറുകള്‍ വരച്ച് നല്‍കും. സംഭാവന നല്‍കുന്നവർക്ക് ഒരു പ്രോത്സാഹനമായാണ് അഞ്‌ജുരാഥ് കാരിക്കേച്ചറുകള്‍ വരച്ചുനല്‍കുന്നത്. അഞ്‌ജുരാഥിന്‍റെ പ്രവർത്തനങ്ങൾ സമൂഹ മാധ്യമങ്ങളിൽ പ്രചരിച്ചതോടെ നിരവധി ആളുകളാണ് കാരിക്കേച്ചറുകൾ വരച്ച് നൽകാനായി രസീതും ഫോട്ടോയും അയക്കുന്നത്.

എഞ്ചിനീയറിങിന് ചേര്‍ന്ന ശേഷമാണ് ഈ മിടുക്കി വരയില്‍ ശ്രദ്ധ കേന്ദ്രീകരിച്ചത്. പത്തനംതിട്ട ഓമല്ലൂർ തുണ്ടിയിൽ വീട്ടിൽ രാധകൃഷ്ണന്‍റെയും ലതയുടെയും മകളാണ് അഞ്‌ജുരാഥ്. നിരവധിപേരാണ് അഞ്‌ജുരാഥിന് അഭിനന്ദനങ്ങളുമായി എത്തുന്നത്.