മനുഷ്യമഹാശൃംഖലയിൽ പങ്കെടുത്തതിനെ വിവാദമാക്കേണ്ട: പി കെ കുഞ്ഞാലിക്കുട്ടി എം.പി

ഗവർണറെ തിരിച്ചുവിളിക്കൽ നടപടിയിൽ ഇടതു മുന്നണി എങ്ങനെ നേരിടുമെന്ന് കാത്തിരിക്കുകയാണെന്നും ഈ കാര്യത്തിൽ ഗവൺമെന്‍റ് ഉറച്ച നിലപാട് എടുക്കണമെന്നും ഇല്ലെങ്കിൽ വിമർശിക്കുമെന്നും കുഞ്ഞാലിക്കുട്ടി പറഞ്ഞു.

മലപ്പുറം: ഇന്നലെ നടന്ന മനുഷ്യമഹാശൃംഖലയിൽ വ്യത്യസ്‌ത പാർട്ടിക്കാർ പങ്കെടുത്തതിനെ വിവാദമാക്കേണ്ടെതില്ലെന്ന് പി കെ കുഞ്ഞാലിക്കുട്ടി എം പി . പൗരത്വ നിയമ ഭേദഗതിക്കതിരെയുള്ള എല്ലാ സമരത്തിലും എല്ലാവരും പങ്കെടുക്കുമെന്നും ആ വിഷയം വിവാദമാക്കുന്നത് ബിജെപിയെ സഹായിക്കാൻ മാത്രമേ ഉപകരിക്കൂവെന്നും അദ്ദേഹം മലപ്പുറത്ത് പറഞ്ഞു. ഗവർണറെ തിരിച്ചുവിളിക്കൽ നടപടിയെ ഇടതു മുന്നണി എങ്ങനെ നേരിടുമെന്ന് കാത്തിരിക്കുകയാണെന്നും ഈ കാര്യത്തിൽ ഗവൺമെന്‍റ് ഉറച്ച നിലപാട് എടുക്കണമെന്നും ഇല്ലെങ്കിൽ വിമർശിക്കുമെന്നും കുഞ്ഞാലിക്കുട്ടി പറഞ്ഞു.

കൂടുതൽ സംസ്ഥാന ഗവൺമെന്‍റുകൾ പൗരത്വ നിയമ ഭേദഗതിക്ക് എതിരെ വരുന്നത് പ്രതീക്ഷ നൽകുന്നതാണെന്നും കൂടെയുള്ള കക്ഷികൾ പോലും ബിജെപിക്ക് എതിരായി വരികയാണെന്നും പി കെ കുഞ്ഞാലിക്കുട്ടി പറഞ്ഞു. ഭയപ്പെടുത്തി വരുതിക്ക് വരുത്താമെന്ന ആലോചന നടപ്പാവില്ലെന്നും എൽഡിഎഫ്, യുഡിഎഫ് നടത്തുന്ന ജാഥകളിൽ ആരൊക്കെ പങ്കെടുക്കുമെന്ന് മാധ്യമങ്ങൾ വല്ലാതെ നോക്കേണ്ടതില്ലെന്നും അദ്ദേഹം പറഞ്ഞു.