പച്ചക്കറിയുടെ മറവിൽ ഒളിപ്പിച്ചുകടത്തി ; കർണാടക മദ‍്യം പിടിച്ച് എക്സൈസ്

750 എം.എൽ, 375 എം.എൽ അടങ്ങുന്ന 136 കുപ്പികളാണ് വഴിക്കടവ് ആനമറി എക്സൈസ് ചെക്ക്പോസ്റ്റിൽ പിടിച്ചത്.

മലപ്പുറം :പിക്കപ്പ് വാനിൽ പച്ചക്കറിയുടെ മറവിൽ ഒളിപ്പിച്ചുകടത്തുകയായിരുന്ന 67.5 ലിറ്റർ കർണാടക മദ‍്യം വഴിക്കടവ് ആനമറി എക്സൈസ് ചെക്ക്പോസ്റ്റിൽ പിടികൂടി. വ‍്യാഴാഴ്ച വൈകുന്നേരം 6 മണിയോടെ വാഹനപരിശോധനക്കിടെയാണ് മദ്യം പിടികൂടിയത്. വാൻ ഡ്രൈവർ പെരിന്തൽമണ്ണ താഴേക്കോട് മുല്ലപള്ളി വീട്ടിൽ ഫൈസലിനെ എക്സൈസ് അറസ്റ്റുചെയ്‌തു.

750 എം.എൽ, 375 എം.എൽ അടങ്ങുന്ന 136 കുപ്പികളാണ് പിക്കപ്പ് വാനിൽ ഉണ്ടായിരുന്നത്. പ്രതിയെ നിലമ്പൂർ എക്സൈസ് റെയ്ഞ്ചിന് കൈമാറി.പിടിച്ചെടുത്ത മദ്യവും കൈമാറിയിട്ടുണ്ട്.

എക്സൈസ് ഇൻസ്പെക്ടർ വി.വി.ജയപ്രകാശ്, പ്രിവന്‍റീവ് ഓഫീസർ പി.സുധാകരൻ, സിവിൽ എക്സൈസ് ഓഫിസർമാരായ എം.സുലൈമാൻ, കെ.അമീൻ അൽതാഫ്, പി.രജിലാൽ എന്നിവരാണ് പരിശോധനാസംഘത്തിലുണ്ടായിരുന്നത്.