മലപ്പുറം: പരപ്പനങ്ങാടി കേട്ടുങ്ങല്‍ ബീച്ചില്‍ വിനോദ യാത്ര സംഘം സഞ്ചരിച്ച ബോട്ട് മുങ്ങി 22 പേര്‍ മരിച്ച സംഭവത്തില്‍ അനുശോചനമറിയിച്ച് പ്രധാനമന്ത്രി നരേന്ദ്ര മോദിയും മറ്റ് പ്രധാന നേതാക്കളും. രാഷ്‌ട്രപതി ദ്രൗപതി മുര്‍മു, ഉപരാഷ്‌ട്രപതി ജഗദീപ് ധന്‍കര്‍ എന്നിവരും അനുശോചിച്ചു. 'കേരളത്തിലെ മലപ്പുറത്ത് ബോട്ട് അപകടത്തില്‍ നിരവധി പേര്‍ മരിച്ച സംഭവത്തില്‍ ഖേദിക്കുന്നു. മരിച്ച ഓരോ വ്യക്തിയുടെയും കുടുംബങ്ങള്‍ക്ക് രണ്ട് ലക്ഷം രൂപ ധനസഹായം നല്‍കും' -പ്രധാനമന്ത്രി ട്വിറ്ററില്‍ കുറിച്ചു.
മലപ്പുറത്ത് ബോട്ട് അപകടത്തില്‍ നിരവധി പേര്‍ മരിച്ച സംഭവം ഏറെ സങ്കടകരവും ഞെട്ടിപ്പിക്കുന്നതുമാണെന്നും രാഷ്‌ട്രപതി ദ്രൗപതി മുര്‍മു ട്വിറ്ററില്‍ കുറിച്ചു. 'അപകടത്തില്‍ മരിച്ചവര്‍ക്ക് ഹൃദയംഗമമായ അനുശോചനം അറിയിക്കുന്നു. അപകടത്തില്‍ നിന്ന് രക്ഷപ്പെട്ടവരുടെ ക്ഷേമത്തിനായി പ്രാര്‍ഥിക്കുന്നു' -ദ്രൗപതി മുര്‍മു ട്വീറ്റ് ചെയ്‌തു.