മലപ്പുറം: രാമപുരത്തെ യെസ്സാര് പെട്രോള് പമ്പില് നിന്നും ഫുള് ടാങ്ക് പെട്രോള് അടിച്ചതിന് ശേഷം പണം കൊടുക്കാതെ കടന്നുകളഞ്ഞ പ്രതികളില് ഒരാളെ കൊളത്തൂര് പൊലീസ് അറസ്റ്റ് ചെയ്തു. കണ്ണൂര് തളിപ്പറമ്പ് പടപ്പേങ്ങാട് കായക്കോല് ജാസിം (19) ആണ് അറസ്റ്റിലായത്. പൊലീസിനെ കണ്ടയുടൻ കാറിലുണ്ടായിരുന്ന മറ്റു രണ്ടുപേര് ഓടി രക്ഷപ്പെട്ടു.
ശനിയാഴ്ച രാവിലെ രാമപുരം യെസ്സാര് പെട്രോള് പമ്പില് നിന്ന് കറുപ്പ് നിറത്തിലുള്ള ഹ്യുണ്ടായ് ഐ10 കാറില് വന്ന സംഘം 2,500 രൂപയുടെ പെട്രോള് അടിച്ചതിന് ശേഷം പണം കൊടുക്കാതെ വേഗത്തില് പെരിന്തല്മണ്ണ ഭാഗത്തേക്ക് വാഹനം ഓടിച്ചു പോവുകയായിരുന്നു. കൊളത്തൂര് പൊലീസ് നടത്തിയ അന്വേഷണത്തില് കാറിലെ നമ്പര് തെറ്റായാണ് കാണിച്ചിരുന്നതെങ്കിലും കറുത്ത ഐ 10 കാറിനെപ്പറ്റിയുള്ള അന്വേഷണത്തിനൊടുവില് ഉടമസ്ഥനെ കണ്ടെത്തി ചോദിച്ചതില് കാര് വാടകക്ക് കൊടുത്തതാണെന്ന് മനസ്സിലായി.