മലപ്പുറം: താനൂർ മുസ്ലീലീഗ് പ്രവർത്തകൻ കൊല്ലപ്പെട്ട സംഭവം ദൗര്‍ഭാഗ്യകരമെന്ന് മന്ത്രി കെ.ടി.ജലീല്‍. മുസ്ലീം ലീഗും സിപിഎമ്മും തമ്മിലുള്ള ആക്രമണങ്ങളാണ് താനൂരിൽ നടക്കുന്നത്. സമാധാന ശ്രമങ്ങളെയൊക്കെ പരാജയപ്പെടുത്തികൊണ്ടാണ് പലരുടെയും ഭാഗത്ത് നിന്നും നീക്കങ്ങള്‍ ഉണ്ടായതെന്നും മന്ത്രി തിരൂരില്‍ പറഞ്ഞു.
ഒരുപാട് കാലങ്ങളായി താനൂര്‍ സംഘര്‍ഷമേഖലയാണ്. ഇതിനെ തടയിടാൻ ശ്രമങ്ങൾ നടത്തിയിരുന്നുവെങ്കിലും ശ്രമങ്ങളെ പരാജയപ്പെടുത്തി കൊണ്ടുള്ള നീക്കങ്ങളായിരുന്നു ചിലരുടെ ഭാഗത്തുനിന്ന് ഉണ്ടായത്. ഇനിയെങ്കിലും താനൂർ തീരദേശ മേഖലയിൽ സമാധാനം സ്ഥാപിക്കുന്നതിനുള്ള ഇടപെടലുകൾ നടത്തണമെന്നും ജലീല്‍ ആവശ്യപ്പെട്ടു. അവിടെ സിപിഎമ്മിന്‍റെ ഭാഗത്തുനിന്നാണ് ആക്രമണം ഉണ്ടായിരിക്കുന്നതെന്ന മാധ്യമപ്രവർത്തകരുടെ വാദത്തോട് മന്ത്രി പ്രതികരിച്ചില്ല. മരിച്ചു ജീവിക്കുന്ന ഒരുപാട് ആളുകൾ ഇന്നും താനൂരിലും മറ്റും ഉണ്ടെന്നും മന്ത്രി കൂട്ടിച്ചേര്‍ത്തു.