എടക്കരയിൽ കനത്ത കാറ്റിലും മഴയിലും മരം വീണ് വീടുകള്‍ തകര്‍ന്നു

കാറ്റിൽ നിരവധി മരങ്ങള്‍ വീണ് വൈദ്യുതി തൂണടക്കം പലസ്ഥലങ്ങളിലും തകര്‍ന്നിട്ടുണ്ട്.

മലപ്പുറം: മലപ്പുറം എടക്കരയിൽ കനത്ത കാറ്റിലും മഴയിലും മരം വീണ് വീടുകള്‍ തകര്‍ന്നു. വഴിക്കടവ് പുന്നക്കലിലെ മണ്ണൂര്‍ക്കാട്ടില്‍ ദാസന്‍, രാധാകൃഷ്ണന്‍ എന്നിവരുടെ വീടുകള്‍ക്കാണ് നാശം സംഭവിച്ചത്. തിങ്കളാഴ്‌ച്ച വൈകുന്നേരത്തോടെയായിരുന്നു വേനല്‍ മഴക്കൊപ്പം കാറ്റ് വീശിയത്. ദാസന്‍റെ വീടിന് സമീപത്തുള്ള പറമ്പിലെ തേക്ക് മരമാണ് വീടിന് മുകളിലേക്ക് വീണത്. വീടിനകത്ത് ആളുണ്ടായിരുന്നെങ്കിലും അപകടമുണ്ടായില്ല. കാറ്റിൽ നിരവധി മരങ്ങള്‍ വീണ് വൈദ്യുതി തൂണടക്കം പലസ്ഥലങ്ങളിലും തകര്‍ന്നിട്ടുണ്ട്. ഇതിനാല്‍ മേഖലയില്‍ തിങ്കളാഴ്ച വൈദ്യുതിയും പോയിരുന്നു.