മലപ്പുറം: കേരള സംസ്ഥാന ആസൂത്രണ ബോർഡ് അംഗം ഡോക്ടർ ബി ഇക്ബാൽ ചാലിയാർ കുടുംബാരോഗ്യ കേന്ദ്രത്തിൽ സന്ദർശനം നടത്തി. ചാലിയാർ കുടുംബാരോഗ്യ കേന്ദ്രത്തിന് ദേശീയ അംഗീകാരം ലഭിച്ച പശ്ചാത്തലത്തിലാണ് സന്ദര്‍ശനം. പ്രാഥമിക ആരോഗ്യ കേന്ദ്രങ്ങളിൽ വന്നിട്ടുള്ള വ്യതിയാനങ്ങളെ കുറിച്ച് വിലയിരുത്തുന്നതിനാണ് അദ്ദേഹം ഇവിടെയെത്തിയത്.
ചാലിയാർ കുടുംബാരോഗ്യ കേന്ദ്രത്തിൽ ഡോക്ടർ ബി ഇക്ബാൽ സന്ദര്‍ശനം നടത്തി ചാലിയാർ കുടുംബാരോഗ്യ കേന്ദ്രത്തിന് കീഴിൽ ആദിവാസി മേഖലയിൽ നടപ്പാക്കുന്ന ട്രൈബൽ ഹബ്, സ്പെഷ്യാലിറ്റി വിഭാഗം, ഹൃദ്രോഗ ബാധിതര്‍ക്കുള്ള ടെലി മെഡിസിൻ പദ്ധതി, ഗർഭിണികൾക്കുള്ള പ്രതിമാസ സെപഷ്യാലിറ്റി പരിശോധന, സായാഹ്ന ഒ.പി എന്നീ പദ്ധതികളെക്കുറിച്ചും അദ്ദേഹം ജീവനക്കാരോട് ചോദിച്ചറിഞ്ഞു. ദേശീയ ആരോഗ്യ ദൗത്യം മലപ്പുറം ജില്ലാ പ്രോഗ്രാം മാനേജർ ഡോ. ഷിബുലാൽ, ചാലിയാർ ഗ്രാമപഞ്ചായത്ത് പ്രസിഡന്‍റ് പി.ടി.ഉസ്മാൻ തുടങ്ങിയവര്‍ പങ്കെടുത്തു.
