കഥകളുടെ പെരുന്തച്ചന്‍ എം.ടി വാസുദേവന്‍ നായര്‍ 89ന്‍റെ നിറവില്‍. സ്വന്തം സിനിമയുടെ ലൊക്കേഷനിൽ എംടി ഇന്ന് പിറന്നാൾ ആഘോഷിക്കും. 1970 ൽ എംടിയുടെ തിരക്കഥയിൽ പി.എൻ.മേനോൻ സംവിധാനം ചെയ്‌ത ‘ഓളവും തീരവും’ സിനിമ അരനൂറ്റാണ്ടിനു ശേഷം പുനഃസൃഷ്‌ടിക്കുന്ന തൊടുപുഴയ്ക്കടുത്തുള്ള ലൊക്കേഷനിലാണ് 89–ാം പിറന്നാളാഘോഷം. അനന്യമായ കാഴ്‌ചാനുഭവവും വായനാനുഭവവും മലയാളത്തിന് സമ്മാനിച്ച എംടിയ്ക്ക് സംസ്‌കാരിക മലയാളം നിറവാര്‍ന്ന പിറന്നാള്‍ നേരുന്നു.
മലയാളത്തിന് കഥകളുടെ കണ്ണാന്തളിപ്പൂക്കാലം സമ്മാനിച്ച വീരഗാഥയാണ് ആ സര്‍ഗജീവിതം. തീക്ഷ്‌ണാനുഭവങ്ങളുടെ മൂശയില്‍ കഥകള്‍ വാര്‍ത്തെടുക്കുകയായിരുന്നു ആ രാജശില്‍പ്പി. ഉള്ളുലച്ച മുഹൂര്‍ത്തങ്ങളെ ഊതിക്കാച്ചി വിളക്കി ശില്‍പഭദ്രമാക്കിയ എഴുത്ത്.
വിധിയുടെ ഊരാക്കുടുക്കില്‍ ഉഴലുന്നവരായിരുന്നു എംടി പരിചയപ്പെടുത്തിയവരിലേറെയും. അകത്തളങ്ങളിലെ ദുരിത പര്‍വ്വങ്ങള്‍ അക്ഷരമൂര്‍ച്ചയോടെയാണ് വായനക്കാരിലേക്ക് പകര്‍ന്നത്. ബന്ധങ്ങളും ബന്ധനങ്ങളും പ്രമേയമായപ്പോള്‍ മലയാളമെന്ന ചെറുഭാഷയില്‍ ലോകോത്തര കഥകളും നോവലുകളും സിനിമകളും പിറന്നു.
മലയാളിയെ വേട്ടയാടുന്ന കുട്ട്യേടത്തിയും വേലായുധനും:കടലാസിലും വെള്ളിത്തിരയിലും തീക്കോരിയിട്ട കഥാസന്ദര്‍ഭങ്ങള്‍ അനുവാചകഹൃദയം നിരന്തരം നീറ്റി. അതിഭാവുകത്വത്തിന്‍റെ മേലാപ്പുകളില്ലാതെ, ജീവിതത്തില്‍ നിന്ന് അടര്‍ത്തിയെടുത്ത അനുഭവങ്ങളിലൂന്നിയായിരുന്നു രചനകള്‍. പലമകളുടെ സങ്കലനം ജ്വലിപ്പിച്ച സൃഷ്‌ടികള്‍. വൈവിധ്യ സുന്ദരമായ പാത്രരൂപകല്‍പനകള്‍.
കുട്ട്യേടത്തിയും, ഇരുട്ടിന്‍റെ ആത്മാവിലെ ഭ്രാന്തന്‍ വേലായുധനും, നാലുകെട്ടിലെ അപ്പുണ്ണിയും, കാലത്തിലെ സേതുമാധവനും, അസുരവിത്തിലെ ഗോവിന്ദന്‍കുട്ടിയും വായനക്കാരുടെ ഉറക്കം കെടുത്തിയവരാണ്. നെഞ്ചിന് കനമേകിയവരാണ്. അനേക ഹൃദയങ്ങളില്‍ കനിവിന്‍റെ ഉറവയ്‌ക്ക് ചാലിട്ടവരാണ്.
അതിജീവനത്തിനായി പോരാടുന്നവരും അസ്‌തിത്വ പ്രതിസന്ധികളുമായി അലയുന്നവരും പുറം കാഴ്‌ചകളില്‍ ഭ്രമിച്ച് ഉഴറിയവരുമെല്ലാം കഥകളിലും നോവലുകളിലും തിരക്കഥകളിലുമെത്തി അനുവാചകരോട് ജീവിതം പങ്കുവച്ചു. നാട്ടുകാഴ്‌ചാ സന്ദര്‍ഭങ്ങള്‍ അത്രമേല്‍ ജീവസ്സോടെ പശ്ചാത്തലമേകി.
കൂടല്ലൂരും നിളയും ചേര്‍ത്തുവരച്ച എംടി:എംടിയെന്ന കഥാകാരനെ വീടും നാടും പരുവപ്പെടുത്തുകയായിരുന്നു. പുന്നയൂര്‍ക്കുളം നാരായണന്‍ നായര്‍ തെക്കേപ്പാട്ട് അമ്മാളു അമ്മ ദമ്പതികളുടെ മകനായി 1933 ജൂലൈ 15 ന് പൊന്നാനി താലൂക്കിലെ കൂടല്ലൂരിലായിരുന്നു ജനനം. കോപ്പന്‍മാസ്റ്ററുടെ കുടപ്പള്ളിക്കൂടത്തില്‍ മൂന്നാം വയസില്‍ അക്ഷരമധുരമറിഞ്ഞു. കൂടല്ലൂരും നിളയും വാസുവിന് കൈനിറയെ കഥകളേകി.