പെൺജന്മത്തിന്‍റെ വിവിധ ഭാവങ്ങൾ ക്യാമറയിൽ പകർത്തി 'പെണ്ണടയാളം' ഫോട്ടോഗ്രഫി പ്രദർശനം

പെൺജന്മത്തിലെ വിവിധ ഭാവങ്ങളും അവസ്ഥകളും വിവരിക്കുന്ന ഫോട്ടോഗ്രഫി പ്രദർശനവുമായി അഞ്ച് യുവാക്കൾ. കോഴിക്കോട് ലളിതകലാ അക്കാദമി ആർട്ട് ഗ്യാലറിയിലാണ് ഫോട്ടോഗ്രാഫി പ്രദർശനം നടത്തുന്നത്.

ചിന്തിക്കാനും പ്രവർത്തിക്കാനും ഒരുപാടുള്ള ആധുനികകാലത്ത് സ്ത്രീ ജന്മത്തിന്‍റെ വിവിധ ഭാവങ്ങളും അവസ്ഥകളും തെരഞ്ഞെടുത്ത് ക്യാമറയിൽപകർത്തി 'പെണ്ണടയാളം' എന്ന ഫോട്ടോഗ്രഫി പ്രദർശനം നടത്തുകയാണ് അഞ്ച് യുവാക്കൾ. സുബീഷ് യുവ, സുഭാഷ് കൊടുവള്ളി, ഷിറാസ് സിതാര, ദേവരാജ് ദേവൻ, സുഭാഷ് നീലാംബരി എന്നിവരുടെ ഫോട്ടോകളാണ് പ്രദർശനത്തിലുള്ളത്. ഫേസ്ബുക്ക് വഴി പരിചയപ്പെട്ട ഇവർ 'ക്യാമറീസ്' എന്ന ഗ്രൂപ്പ് ഉണ്ടാക്കിയാണ് പ്രദർശനം ഒരുക്കിയത്. ഫോട്ടോഗ്രാഫിയെ ഒരുപോലെ സ്നേഹിക്കുന്ന ഇവർ യാത്രാ വേളയിലും മറ്റും എടുത്ത ഫോട്ടോകളാണ് ഇതിൽ കൂടുതലും.

കഴിഞ്ഞ അഞ്ചുവർഷക്കാലത്തെ അന്വേഷണത്തെയും അനുഭവത്തെയും നിസ്സഹായതയെയും പ്രതിരോധത്തെയും അടയാളപ്പെടുത്തുകയാണ്'പെണ്ണടയാളം' എന്ന ഫോട്ടോഗ്രഫി പ്രദർശനം. സമൂഹത്തിൽ ഏറ്റവും കൂടുതൽ ചർച്ചചെയ്യപ്പെടുന്ന സ്ത്രീ രാഷ്ട്രീയമാണ് അതിനാലാണ് ഇത്തരം വിഷയം ഫോട്ടോഗ്രാഫിയിക്കായിതിരഞ്ഞെടുക്കാൻ കാരണമെന്ന്യുവാക്കൾ വ്യക്തമാക്കി.

സാമൂഹിക പ്രതിബന്ധതയുള്ള വിഷയങ്ങളായിരിക്കും പ്രദർശനത്തിന് തിരഞ്ഞെടുക്കുന്നതെന്നും തങ്ങൾക്ക് പറയാനുള്ള കാര്യങ്ങൾ ഫോട്ടോഗ്രാഫിയിലൂടെ ജനങ്ങളെ അറിയിക്കുക എന്നതാണ് ഉദ്ദേശിക്കുന്നതെന്നും യുവാക്കൾ പറഞ്ഞു.കേവലം കാഴ്ചകൾക്കപ്പുറത്തെ പ്രതിഷേധവും പ്രതിരോധവും മനസ്സിലുടക്കിയ കാഴ്ചകളടങ്ങിയ പെണ്ണടയാളം ഫോട്ടോഗ്രാഫി പ്രദർശനം മാർച്ച് 10ന് സമാപിക്കും.