Nipah death Route Map Of Ayancheri Resident നിപ ബാധിച്ച് മരിച്ച ആയഞ്ചേരി സ്വദേശിയുടെ റൂട്ട് മാപ്പും പുറത്ത്

Nipah death Route Map Of Ayancheri Resident out : നിപ ബാധിച്ച് മരിച്ച ആയഞ്ചേരി സ്വദേശിയായ 40കാരന്‍റെ മൃതദേഹം ഇന്നലെയാണ് സംസ്‌കരിച്ചത്.

കോഴിക്കോട്:നിപ ബാധിച്ച് രണ്ടാമത് മരിച്ച ആയഞ്ചേരി സ്വദേശിയുടെ റൂട്ട് മാപ്പും പുറത്ത് വിട്ടു. സെപ്റ്റംബർ അഞ്ചിനാണ് ഇയാൾക്ക് രോഗലക്ഷണം തുടങ്ങിയത്. അന്ന് ഇയാൾ ബന്ധുവീട് സന്ദർശിച്ചിരുന്നു. തൊട്ടടുത്ത രണ്ട് ദിവസവും ബന്ധു വീടുകളിൽ എത്തിയ ഇയാൾ ഏഴാം തിയതി റൂബിയാൻ സൂപ്പർ മാർക്കറ്റിലും എത്തി.

എട്ടാം തിയതി ആയഞ്ചേരി എഫ്.എച്ച്.സി യിൽ ചികിത്സ തേടി. അന്ന് തന്നെ തട്ടാൻകോഡ് മസ്‌ജിദിലും കോഴിക്കോട് ഇഖ്റയിലും ഇയാൾ എത്തിയിരുന്നു. 9നും 10നും വില്യാപ്പള്ളി കുടുംബാരോഗ്യ കേന്ദ്രത്തിൽ ചികിത്സ തേടി. 10ന് വൈകിട്ട് വടകര ജില്ലാ ആശുപത്രിയിൽ ചികിത്സ തേടി. 11ന് രാവിലെ ഡോ. ജ്യോതികുമാറിന്‍റെ ക്ലിനിക്കിലെത്തിയെന്നും അവിടെ നിന്ന് വടകര സഹകരണ ആശുപത്രിയിലേക്കും പിന്നീട് കോഴിക്കോട് മിംസ് ആശുപത്രിയിലേക്കും മാറ്റിയെന്നുമാണ് റൂട്ട് മാപ്പ് വ്യക്തമാക്കുന്നത്.

നിപ ബാധിച്ച് മരിച്ച ആയഞ്ചേരി സ്വദേശിയുടെ റൂട്ട് മാപ്പും പുറത്ത്

ഇന്നലെയാണ് നിപ ബാധിച്ച് മരിച്ച ആയഞ്ചേരി സ്വദേശിയായ 40കാരന്‍റെ മൃതദേഹം സംസ്‌കരിച്ചത്. കടമേരി ജമാഅത്ത് പള്ളി ഖബറിസ്ഥാനിലാണ് സംസ്‌കാരം നടന്നത്. പ്രോട്ടോകോള്‍ പാലിച്ചായിരുന്നു സംസ്‌കാര ചടങ്ങുകള്‍. ഓഗസ്റ്റ് 30ന് മറ്റൊരു സ്വകാര്യ ആശുപത്രിയില്‍ മരണപ്പെട്ട 45 വയസുകാരനുമായുള്ള സമ്പർക്കത്തില്‍ നിന്നാണ് ഇയാൾക്ക് രോഗ ബാധയുണ്ടായതെന്ന് സ്ഥിരീകരിച്ചതിനാല്‍ അതും നിപ ബാധയെന്ന നിഗമനത്തില്‍ ആരോഗ്യവകുപ്പ് എത്തിയിരുന്നു (Nipah cases Kozhikode)

അതേസമയം മരുതോങ്കരയില്‍ നിപ ബാധയെ തുടര്‍ന്ന് മരിച്ച ആളുടെ റൂട്ട് മാപ്പും നേരത്തെ പുറത്തുവന്നിരുന്നു. നിപ ബാധിച്ച് മരിച്ച 47 കാരന്‍റെ റൂട്ട് മാപ്പായിരുന്നു പുറത്തുവിട്ടത്. ഓഗസ്റ്റ് 22നാണ് മരിച്ച ആള്‍ക്ക് രോഗലക്ഷണങ്ങള്‍ കണ്ട് തുടങ്ങിയത്. അതിന് ശേഷം അദ്ദേഹം സന്ദര്‍ശിച്ച സ്ഥലങ്ങളാണ് പുറത്തുവന്നത്.

ഓഗസ്റ്റ് 23ന് തിരുവളളൂരില്‍ വൈകുന്നേരം ഏഴ് മണിക്ക് ഒരു കുടുംബ ചടങ്ങില്‍ പങ്കെടുത്തു. തുടര്‍ന്ന് ഓഗസ്റ്റ് 25ന് 11 മണിക്ക് മുളളംകുന്ന് ഗ്രാമീണ ബാങ്ക് സന്ദര്‍ശിച്ചു. ഇതേദിവസം 12.30ന് കള്ളാട് ജുമാ മസ്‌ജിദ് ഇദ്ദേഹം സന്ദര്‍ശിച്ചതായും റൂട്ട് മാപ്പിലുണ്ട്. ഓഗസ്റ്റ് 26ന് രാവിലെ 11 മുതല്‍ 1.30 വരെ കുറ്റ്യാടി ഡോ. ആസിഫലി ക്ലിനിക്കില്‍ അദ്ദേഹം സന്ദര്‍ശനം നടത്തിയിരുന്നു.

തുടര്‍ന്ന് ഓഗസ്റ്റ് 28ന് രാത്രി 9.30ന് തൊട്ടില്‍പാലം ഇഖ്‌റ ആശുപത്രിയിലും ഓഗസ്റ്റ് 29ന് അര്‍ധരാത്രി 12ന് കോഴിക്കോട് ഇഖ്‌റ ആശുപത്രിയിലും പ്രവേശിപ്പിച്ചു. പിന്നാലെ ഓഗസ്റ്റ്‌ 30ന് ആശുപത്രിയില്‍ വച്ച് മരണം സംഭവിക്കുകയായിരുന്നു. ഇതാണ് റൂട്ട് മാപ്പില്‍ കാണിച്ചിരിക്കുന്നത്.