കോഴിക്കോട്: ജില്ല കോൺഗ്രസ് കമ്മിറ്റി മുൻ പ്രസിഡന്‍റ് യു.രാജീവൻ അന്തരിച്ചു. 67 വയസായിരുന്ന അദ്ദേഹം അർബുദ ബാധിതനായി ചികിത്സയിലായിരുന്നു. കൊയിലാണ്ടി കൊല്ലം സ്വദേശിയാണ്.
രാവിലെ 9 മണിക്ക് (25.03.2022) ഡിസിസിയിൽ പൊതുദർശനത്തിന് വയ്‌ക്കും. കെ.എസ്.യുവിലൂടെ പൊതുരംഗത്തെത്തിയ രാജീവൻ പുളിയഞ്ചേരി സൗത്ത് എൽ.പി സ്‌കൂളിൽ അധ്യാപകനായിരിക്കെ സ്വയം വിരമിച്ച് മുഴുവൻ സമയ രാഷ്ട്രീയ പ്രവർത്തകനാവുകയായിരുന്നു. ടി സിദ്ദിഖ് ഡി.സി.സി പ്രസിഡന്‍റായിരിക്കെ വൈസ് പ്രസിഡന്‍റ് ആയിരുന്ന രാജീവൻ പിന്നീട് പ്രസിഡന്‍റ് സ്ഥാനത്തേക്ക് എത്തുകയായിരുന്നു.
യൂത്ത് കോണ്‍ഗ്രസ് ജില്ല സെക്രട്ടറി, സംസ്ഥാന നിർവാഹക സമിതി അംഗം, കൊയിലാണ്ടി മണ്ഡലം കോണ്‍ഗ്രസ് പ്രസിഡന്‍റ്, ബ്ലോക്ക് കോണ്‍ഗ്രസ് പ്രസിഡന്‍റ്, യു.ഡി.എഫ് കൊയിലാണ്ടി നിയോജക മണ്ഡലം ജനറല്‍ കണ്‍വീനർ, കെ.പി.സി.സി നിർവാഹക സമിതി അംഗം, സംസ്ഥാന സഹകരണ ബാങ്ക്, ജില്ല സഹകരണ ബാങ്ക് എന്നിവയുടെ എക്‌സിക്യൂട്ടിവ് ഡയറക്‌ടര്‍, പിഷാരികാവ് ദേവസ്വം മുന്‍ ട്രസ്റ്റി ചെയര്‍മാന്‍, കൊയിലാണ്ടി സർവിസ് സഹകരണ ബാങ്ക് പ്രസിഡന്‍റ് തുടങ്ങിയ പദവികള്‍ വഹിച്ചിട്ടുണ്ട്.
ALSO READ:'തിരുവഞ്ചൂര്‍ കാണിച്ച മാപ്പ് വ്യാജം' ; സജി ചെറിയാനുവേണ്ടി അലൈന്‍മെന്‍റ് മാറ്റിയെന്ന ആരോപണത്തില്‍ കെ റെയില്‍ കോര്‍പ്പറേഷന്‍
