കൂടത്തായി കൊലപാതകം; പ്രതികളുടെ റിമാന്‍ഡ് നീട്ടി

താമരശ്ശേരി ജുഡീഷ്യൽ ഫസ്റ്റ് ക്ലാസ് കോടതി രണ്ടിലാണ് പ്രതികളെ ഹാജരാക്കിയത്

കോഴിക്കോട്: കൂടത്തായി കൊലപാതക പരമ്പരയിലെ റോയ് വധക്കേസിൽ പ്രതികളായ ജോളി, മാത്യു, പ്രജികുമാർ എന്നിവരുടെ ജാമ്യാപേക്ഷ തള്ളിയ കോടതി ഇവരുടെ റിമാന്‍ഡ് കാലാവധി അടുത്ത മാസം മൂന്ന് വരെ നീട്ടി. ഇന്ന് അവസാനിക്കേണ്ടിയിരുന്ന പ്രതികളുടെ റിമാൻഡ് കാലാവധിയാണ് നവംബര്‍ മൂന്ന് വരെ നീട്ടിയത്. താമരശ്ശേരി ജുഡീഷ്യൽ ഫസ്റ്റ് ക്ലാസ് കോടതി രണ്ടിലാണ് പ്രതികളെ ഹാജരാക്കിയത്.

അതിനിടെ സിലി വധക്കേസിൽ പ്രൊഡക്ഷൻ വാറണ്ട് പുറപ്പെടുവിച്ച് പ്രതികളെ താമരശ്ശേരി ജുഡീഷ്യൽ മജിസ്ട്രേറ്റ് കോടതി ഒന്നിൽ ഹാജരാക്കിയ ശേഷം പൊലീസ് കസ്റ്റഡിയിൽ ആവശ്യപ്പെടും. ആളൂരിനെ താൻ കേസ് ഏൽപ്പിച്ചിട്ടില്ലെന്ന ജോളിയുടെ വെളിപ്പെടുത്തൽ സത്യമാണോയെന്ന് ജോളിയിൽ നിന്നും ചോദിച്ചറിയണമെന്ന് ബാർ അസോസിയേഷന് വേണ്ടി ഏതാനും അഭിഭാഷകര്‍ കോടതിയോട് ആവശ്യപ്പെട്ടിരുന്നു. എന്നാൽ ഈ വിഷയത്തില്‍ കോടതി ഇടപെട്ടില്ല.